LSG Vs PBKS : லக்னோ அபார வெற்றி! படுதோல்வியை தவிர்த்த பஞ்சாப்!

ஐபிஎல் கிரிக்கெட் போட்டியில் பஞ்சாப் அணிக்கு எதிரான லீக் ஆட்டத்தில் 56 ரன்கள் வித்தியாசத்தில் லக்னோ அணி அபார வெற்றி பெற்றது.

மொகாலி : 16வது ஐபிஎல் கிரிக்கெட் போட்டி நாடு முழுவதும் கோலாகலமாக நடைபெற்று வருகிறது. மொகாலி ஐ எஸ் பிந்தரா மைதானத்தில் நடைபெற்ற 38வது லீக் ஆட்டத்தில் லக்னோ சூப்பர் ஜெயண்ட்ஸ், பஞ்சாப் கிங்ஸ் அணிகள் பலப்பரீட்சை நடத்தின. டாஸ் வென்ற பஞ்சாப் அணியின் கேப்டன் ஷிகர் தவான் பந்து வீச்சை தேர்வு செய்தார்.

லக்னோ சூப்பர் ஜெயன்ட்ஸ் அணியில் கேப்டன் கே எல் ராகுல் மற்றும் கையில் மேயர்ஸ் இன்னிங்சை தொடங்கினர். அடித்து ஆடிய மேயர்ஸ் ஏதுவான பந்துகளை எல்லைக் கோட்டுக்கு அனுப்பினார். மறுபுறம் ராகுல் 9 ரன்களில் வெளியேறினார். அதிரடியாக விளையாடிய கையில் மேயர்ஸ் 54 ரன்கள் குவித்தார்.

லக்னோ அணியில் வீரர்கள் துரித ஆட்டத்தை வெளிப்படுத்தினர். ஆயுஷ் பதானி 43 ரன் அடித்து ஆடிய மார்கஸ் ஸ்டொய்னிஸ் 72 ரன், நிகோலஸ் பூரான் 45 ரன்கள் விளாசினர். நடுகள வீரர்களின் அதிரடி ஆட்டத்தால் லக்னோ அணி இமாலய இலக்கை எட்டியது. 20 ஓவர்கள் முடிவில் 5 விக்கெட் இழப்புக்கு லக்னோ அணி 257 ரன்கள் குவித்தது.

ஐபிஎல் கிரிக்கெட் வரலாற்றில் ஒரு அணியின் அதிகபட்ச ஸ்கோர்ன் இது என்பது குறிப்பிடத்தக்கது. பஞ்சாப் அணியில் ரபடா 2 விக்கெட்டும் சாம் கரன், லிவிங்ஸ்டோன், அர்ஷ்தீப் சிங் ஆகியோர் தலா 1 விக்கெட்டும் வீழ்த்தினர்.

இமாலய இலக்கை நோக்கி பஞ்சாப் அணி விளையாடியது. பஞ்சாப் அணியில் தொடக்க வீரர்கள் கேப்டன் ஷிகர் தவான் 1 ரன் பிரப்சிம்ரன் சிங் 9 ரன் என அடுத்தடுத்து வெளியேறினர். அடுத்தடுத்து களமிறங்கிய பஞ்சாப் வீரர்கள் ஓரளவு நெருக்கடியை புரிந்து அடித்து ஆடத் தொடங்கினர். ஏதுவான பந்துகளை எல்லைக் கோட்டுக்கு அனுப்பிய பஞ்சாப் அணியினர் அதேநேரம் அவசரகதியில் சில ஷாட்டுகளை அடித்து ஆட்டமிழந்தனர்.

அதர்வா டெய்டு 66 ரன், சிக்கந்தார் 36 ரன், லியாம் லிவிங்ஸ்டன் 23 ரன், சாம் கரன் 21 ரன், ஜித்தேஷ் சர்மா 24 ரன் என அடுத்தடுத்து ஆட்டமிழந்தனர். 19 புள்ளி 5 ஓவர்கள் முடிவில் 201 ரன்களுக்கு பஞ்சாப் அணி அனைத்து விக்கெட்டுகளையும் இழந்தது. அர்ஷ்தீப் சிங் மட்டும் 2 ரன்களுடன் களத்தில் நின்றார்

இதன் மூலம் லக்னோ அணி 56 ரன்கள் வித்தியாசத்தில் அபார வெற்றி பெற்றது. இந்த வெற்றியின் மூலம் புள்ளி பட்டியலில் லக்னோ அணி 2வது இடத்திற்கு முன்னேறியது. லக்னோ வீரர் மார்கஸ் ஸ்டொய்னிஸ் ஆட்ட நாயகன் விருது பெற்றார்.

இதையும் படிங்க :CSK Vs RR : சொந்த ஊரில் கெத்து காட்டிய ராஜஸ்தான்! புள்ளி பட்டியலில் சென்னைக்கு சறுக்கல்!