மும்பை: நடப்பு ஐபிஎல் தொடரின் லீக் சுற்று போட்டிகள் தற்போது இறுதிக்கட்டத்தை எட்டியுள்ள நிலையில், சென்னை - ராஜஸ்தான் அணிகளுக்கு இடையேயான போட்டி மும்பை பிரபோர்ன் மைதானத்தில் நேற்று (மே 21) நடைபெற்றது. இதில் முதலில் பேட்டிங் செய்த சென்னை அணி 151 ரன்களை ராஜஸ்தான் அணிக்கு இலக்காக நிர்ணயித்த நிலையில், 19.4 ஓவர்களில் அந்த அணி இலக்கை அடைந்து வெற்றிபெற்றது.
சேஸ் செய்த ராஜஸ்தான்: சென்னை தொடரில் இருந்து வெளியேறினாலும், ராஜஸ்தான் அணி 2ஆம் இடத்திற்கு முன்னேற இதில் கடுமையான ஆட்டத்தை வெளிப்படுத்தியது. மொயின் அலி 93 ரன்களை குவித்த நிலையில், சஹால், மெக்காய் ஆகியோர் தலா 2 விக்கெட்டுகளை வீழ்த்தினர். ராஜஸ்தான் அணி பேட்டர்கள் பட்லர் 2, சாம்சன் 15, படிக்கல் 3 ரன்களில் ஆட்டமிழந்து ஏமாற்றமளிக்க, ஓப்பனர் ஜெய்ஸ்வால் மட்டும் அரைசதம் கடந்து ஆறுதல் அளித்தார்.
அஸ்வின் அதிரடி: மேலும், 5ஆவது வீரராக ஹெட்மயர், ரியான் பராக் இறங்காமல் ரவிச்சந்திரன் அஸ்வின் களமிறக்கப்பட்டார். அதற்கு நல்ல பலனும் கிடைத்தது. அவர் 23 பந்துகளில் 3 சிக்ஸர், 2 பவுண்டரி என 40 ரன்களை குவித்து, ராஜஸ்தான் அணியை குவாலிஃபயர் - 1 போட்டிக்கு அழைத்துச் சென்றுள்ளார். குவாலிஃபயர் - 1 போட்டியில் குஜராத் அணியுடன் ராஜஸ்தான் அணி மோத உள்ளது. சென்னை பந்துவீச்சில் பிரசாந்த் சோலன்கி 2, சிரம்ஜித் சிங், மிட்செல் சான்ட்னர், மொயின் அலி ஆகியோர் தலா 1 விக்கெட்டையும் கைப்பற்றினர்.