மும்பை:15ஆவது ஐபிஎல் தொடரின் 31ஆவது லீக் ஆட்டம் ராயல் சேலஞ்சர்ஸ் பெங்களூரூ - லக்னோ சூப்பர் ஜெயன்ட்ஸ் அணிகளுக்கு இடையே நவி மும்பையில் உள்ள டி.ஒய். பாட்டீல் மைதானத்தில் நேற்று (ஏப். 19) நடைபெற்றது. இப்போட்டியில், டாஸ் வென்ற லக்னோ அணி முதலில் பந்துவீச்சை தேர்வுசெய்தது.
தடுமாற்றம்: கடந்த போட்டியில் இருந்த அதே வீரர்களுடன் களமிறங்கிய ஆர்சிபி அணிக்கு பேட்டிங் முதலில் சொதப்பியது. அனுஜ் ராவத் 4 (5), விராட் கோலி 0 (1), மேக்ஸ்வெல் 23 (11) ரன்கள் என அடுத்தடுத்து பெவிலியனுக்கு திரும்ப பவர்பிளே முடிவில் அந்த அணி 47/3 என்ற நிலையில் இருந்தது.
டூ பிளேசிஸ் 96:ஒருபுறம் டூ பிளேசிஸ் நிலைத்து நின்று ஆடி அரைசதம் கடந்தார், மற்ற பேட்டர்கள் யாரும் பெரியளவில் அவருக்கு கை கொடுக்கவில்லை. மேலும், சதம் அடிப்பார் என எதிர்பார்க்கப்பட்ட டூ பிளேசிஸ் 96 ரன்களில் கடைசி ஓவரில் அவுட்டாக,பெங்களூரூ அணி 6 விக்கெட்டுகளை மட்டும் இழந்து 181 ரன்களை எடுத்தது. லக்னோ பந்துவீச்சில் ஹோல்டர், துஷ்மந்தா சமீரா ஆகியோர் தலா 2 விக்கெட்டுகளை வீழ்த்தினர்.
குர்னால் அதிரடி: 182 ரன்கள் எடுத்தால் வெற்றி என்ற இலக்குடன் லக்னோ அணி களமிறங்கியது. டி காக், மனீஷ் பாண்டே ஆகியோர் சொற்ப ரன்களில் வெளியேற கே.எல்.ராகுல் 30 (24), தீபக் ஹூடா 13 (14) ஆகியோர் சற்றுநேரம் தாக்குபிடித்தனர். மறுமுனையில், குர்னால் பாண்டியா அதிரடியாக விளையாடி விரைவாக ரன்களை குவித்தார். அவர் 28 பந்துகளில் 2 சிக்சர், 5 பவுண்டரிகள் உள்பட 42 ரன்களை எடுத்து மேக்ஸ்வெல் பந்துவீச்சில் ஆட்டமிழந்தார்.