IPL 2021: ராகுல் சஹார், போல்ட் மிரட்டல் பவுலிங் - ஹாட்ரிக் தோல்வியடைந்த சன்ரைசர்ஸ்

சரியான மிடில் ஆர்டர் பேட்ஸ்மேன் இல்லாமல் சன்ரைசர்ஸ் அணி தவித்து வந்த நிலையில் மும்பை இந்தியன்ஸ் அணிக்கு எதிரான போட்டியில் அந்த சோக கதை தொடர்ந்ததால் ஹாட்ரிக் தோல்வியுடன் புள்ளிப்பட்டியலில் கடைசி இடத்தில் உள்ளது.

சென்னை: மோசமான பேட்டிங் காரணமாக மும்பை இந்தியன்ஸ் அணிக்கு எதிரான போட்டியில் சன்ரைசர்ஸ் அணி 13 ரன்கள் வித்தியாசத்தில் தோல்வியடைந்தது.

ஐபிஎல் தொடரின் 9ஆவது லீக் போட்டி மும்பை இந்தியன்ஸ் - சன்ரைசரஸ் இடையே சென்னை சேப்பாக்கத்தில் நடைபெற்றது. இதில், டாஸ் வென்ற மும்பை அணி முதல் பேட்டிங் செய்து 20 ஓவரில் 5 விக்கெட் இழப்புக்கு 150 ரன்கள் எடுத்தது. அந்த அணியில் அதிகபட்சமாக குவெய்டன் டீ காக் 40, பொல்லார்டு 35, ரோஹித் ஷர்மா 32 ரண்களை எடுத்தனர்.

இதைத்தொடர்ந்து களமிறங்கிய சன்ரைசர்ஸ் அணி தொடக்க பேட்ஸ்மேன்கள் வார்னர், பேர்ஸ்ட்ரோ சிறப்பான தொடக்கத்தை அளித்தனர்.

ஆரம்பம் முதல் அதிரடி காட்டிய பேர்ஸ்ட்ரோ பவுண்டரி, சிக்ஸர் மழை பொழிந்தார். 22 பந்துகளில் 43 ரன்கள் எடுத்து க்ருணால் பாண்ட்யா பந்தில் ஹிட் விக்கெட் முறையில் அவுட்டானர்.

மறுமுனையில் நிதானம், அதிரடி என கலந்து ஆடி வந்த வார்னர் 36 ரன்கள் எடுத்தபோத எதிர்பாராத விதமாக ரன் அவுட் ஆனார்.

ஏற்கனவே சரியான மிடில் ஆர்டர் பேட்ஸ்மேன் இல்லாமல் சன் ரைசர்ஸ் அணி தவித்து வந்த நிலையில், இன்றைய போட்டியிலும் முதல் இரண்டு விக்கெட்களுக்குப் பிறகு களமிறங்கிய பேட்மேன்களான மனிஷ் பாண்டே, விராத் சிங், அபிஷேக் ஷர்மா பெரிய அளவில் சோபிக்காமல் பெவிலியனுக்கு நடையை கட்டினர்.

ஒரு புறம் விக்கெட்டுகள் மளமளவென விழுந்த நிலையில், மறுமுனையில் ஆல்ரவுண்டர் விஜய் ஷங்கர் நம்பிக்கை அளிக்கும் விதமாக ஆடினார். கடைசி நேரத்தில் தேவைப்படும் ரன்ரேட் 10 ரன்களுக்கு மேல் இருந்தபோது க்ருணால் பாண்ட்யா ஓவரில் அடுத்தடுத்து 2 சிக்ஸர்களை விளாசினார்.

இருப்பினும் அவரால் தனது அணியை வெற்றிப்பாதைக்கு அழைத்துச் செல்ல முடியவில்லை. 28 ரன்கள் எடுத்திருந்தபோது பும்ராவின் வேகத்தில் சிக்சர் அடிக்க முயற்சித்து சூர்ய குமார் யாதவிடம் கேட்ச் ஆகி அவுட்டானார்.

மற்ற பேட்ஸ்மேன்கள் ஒற்றை இலக்க ரன்களில் வெளியேற, இறுதியில் சன்ரைசரஸ் அணி 19.4 ஓவரில் 137 ரன்களுக்கு அனைத்து விக்கெட்டுகளையும் இழந்தது.

இதன் மூலம் 13 ரன்கள் வித்தியாசத்தில் மும்பை அணி தொடரில் தனது இரண்டாவது வெற்றியை பதிவு செய்தது.

மும்பை அணியில் சிறப்பாக பந்து வீசிய ராகுல் சஹார் 19 ரன்களுக்கு விட்டுக்கொடுத்து 3 விக்கெட்டுகளை வீழ்த்தினார். அதேபோல் இடது வேகப்பந்து வீச்சாளர் போல்டும் 28 ரன்கள் விட்டுக்கொடுத்து 3 விக்கெட்டுகளை எடுத்தார்.

அதேபோல் தற்போது வரை விளையாடிய மூன்று போட்டிகளிலும் சன்ரைசர்ஸ் அணி தோல்வியுற்று புள்ளிப்பட்டியலில் கடைசி இடத்தில் உள்ளது.

இதையும் படிங்க: கால்பந்து ஒலிம்பியன் அகமது உசேன் 89 வயதில் காலமானார்!