முதல் வெற்றியை பறிப்பது யார்? - கொல்கத்தா நைட் ரைடர்ஸ் vs சன்ரைசர்ஸ் ஹைதராபாத்!

ஐபிஎல் தொடரில் இன்று நடைபெறும் எட்டாவது லீக் ஆட்டத்தில் தினேஷ் கார்த்திக் தலைமையிலான கொல்கத்தா நைட் ரைடர்ஸ் (கே.கே.ஆர்) அணி, டேவிட் வார்னர் தலைமையிலான சன்ரைசர்ஸ் ஹைதராபாத்(எஸ்.ஆர்.எச்) அணியுடன் பலப்பரீட்சை நடத்துகிறது.

ரசிகர்களின் பெரும் ஆதரவுடன் ஐபிஎல் தொடரின் 13ஆவது சீசன் ஐக்கிய அரபு அமீரகத்தில் நடைபெற்று வருகிறது. இந்நிலையில் இன்று (செப்.26) நடைபெறவுள்ள எட்டாவது லீக் போட்டியில் கொல்கத்தா நைட் ரைடர்ஸ் அணி, சன்ரைசர்ஸ் ஹைதராபாத் அணியுடன் பலப்பரீட்சை நடத்துகிறது.

ஷேக் சயீத் சர்வதேச கிரிக்கெட் மைதானத்தில் நடைபெறவுள்ள இப்போட்டி, இந்திய நேரப்படி இரவு 7.30 மணிக்கு தொடங்குகிறது. இந்த சீசனின் முதல் போட்டியில் இரு அணிகளும் தோல்வியைத் தழுவியுள்ளதால், இன்றைய போட்டியில் முதல் வெற்றியைப் பெற இரு அணிகளும் கடுமையாக போராடும் என்பதில் சந்தேகமில்லை.

கொல்கத்தா நைட் ரைடர்ஸ் vs சன்ரைசர்ஸ் ஹைதராபாத்

இதனால் இன்றைய போட்டியின் மீதான எதிர்பார்ப்பு ரசிகர்கள் மத்தியில் அதிகரித்துள்ளது.

கொல்கத்தா நைட் ரைடர்ஸ்:

தினேஷ் கார்த்திக் தலைமையிலான கொல்கத்தா நைட் ரைடர்ஸ் அணி, இந்த சீசனின் முதல் போட்டியில் மும்பை இந்தியன்ஸ் அணியை எதிர்கொண்டது. இப்போட்டியில் கேகேஆர் அணி 49 ரன்கள் வித்தியாசத்தில் படுதோல்வியைத் தழுவியது. மேலும் ரஸ்ஸல், நரைன், சுப்மன் கில், இயன் மோர்கன், நிதீஷ் ராணா என அதிரடி வீரர்கள் இருந்தும், தொடரின் முதல் போட்டியில் கேகேஆர் அணி படுமோசமான தோல்வியைச் சந்தித்துள்ளது.

இதனால் ஹைதராபாத் அணியுடனான இன்றைய போட்டியில் வெற்றி பெறவேண்டிய கட்டாயத்தில் கேகேஆர் அணி தள்ளப்பட்டுள்ளது. இன்றைய போட்டியில் ரஸ்ஸல், இயன் மோர்கன், சுப்மன் கில், நிதீஷ் ராணா ஆகியோர் சிறப்பான ஆட்டத்தை வெளிப்படுத்தினால், கேகேஆர் அணியின் வெற்றி உறுதி என்பதில் சந்தேகமில்லை.

ஷிவம் மாவி - சுனில் நரைன்

அதேபோல் பந்துவீச்சு தரப்பில் பாட் கம்மின்ஸ், சுனில் நரைன், குல்தீப் யாதவ் போன்ற அனுபவ வீரர்களுடன் ஷிவம் மாவி, சந்தீப் வாரியர் போன்ற இளம் வேகப்பந்துவீச்சாளர்களும் சிறப்பான ஆட்டத்தை வெளிப்படுத்தியுள்ளனர். அதிலும் ஷிவம் மாவி, மும்பை அணிக்கெதிரான போட்டியின் போது முதல் ஓவரில் டி காக்கின் விக்கெட்டை வீழ்த்தியது மட்டுமில்லாமல், அந்த ஓவரை மெய்டனாகவும் மாற்றினார்.

மேலும் அப்போட்டியில் அவர் ரோஹித் சர்மாவின் விக்கெட்டையும் வீழ்த்தி அசத்தியிருந்தார். இதனால் இன்றைய போட்டியில் ஷிவம் மாவி மீதான எதிர்பார்ப்பு அதிகரித்துள்ளது.

சன்ரைசர்ஸ் ஹைதராபாத்:

டேவிட் வார்னர் தலைமையிலான சன்ரைசர்ஸ் ஹைதராபாத் இந்த சீசனின் முதல் போட்டியை பெங்களூரு அணியுடன் மோதியது. பெரிதும் எதிர்பார்க்கப்பட்ட டேவிட் வார்னர், அன்றைய போட்டியில் எதிர்பாராத விதமாக ரன் அவுட் ஆகி ஏமாற்றமளித்தார். மறுமுனையில் அதிரடி ஆட்டத்தை வெளிப்படுத்தி வந்த பேர்ஸ்டோவ் இறுதி வரை களத்தில் நின்று ஆட்டத்தை முடிப்பார் என எதிர்பார்த்த போது, 61 ரன்களில் அவரும் விக்கெட்டை இழந்து பெவிலியன் திரும்பியது, அணியின் தோல்விக்கு வித்திட்டது.

அதேசமயம் முதல் போட்டியிலேயே நட்சத்திர ஆல்ரவுண்டர் மிட்செல் மார்ஷ் காயமடைந்து, தற்போது ஐபிஎல் தொடரிலிருந்து முற்றிலுமாக விலகியுள்ளார். மேலும் தமிழ்நாடு வீரர் விஜய் சங்கர் பந்துவீச்சு மற்றும் பேட்டிங்கில் சொதப்பியதால், அன்றைய போட்டியில் ஹைதராபாத் அணி அடைந்த தோல்விக்கு முக்கிய காரணமாக ரசிகர்கள் கருத்து தெரிவித்தனர்.

ஜானி பேர்ஸ்டோவ்

இதனால் இன்றைய போட்டியில் அணியில் மாற்றம் ஏற்படும் என்பதும் தெளிவாக தெரிகிறது. அதேசமயம் இன்றைய போட்டியில் கேன் வில்லியம்சன் களமிறங்க அதிக வாய்ப்புகள் இருப்பதால், ஹைதராபாத் அணி ரசிகர்கள் மகிழ்ச்சியில் திளைத்துள்ளனர். பந்துவீச்சு தரப்பில் புவனேஷ்வர் குமார், நடராஜன், ரஷித்கான் ஆகியோர் சிறப்பாக செயல்படும் பட்சத்தில், ஹைதராபாத் அணியின் வெற்றி ஏறக்குறைய உறுதிசெய்யப்படும் என்பதில் மாற்றுக்கருத்து கிடையாது.

நேருக்கு நேர்:

ஹைதராபாத் - கொல்கத்தா அணிகள் ஐபிஎல் தொடரில் இதுவரை 17 முறை நேருக்கு நேர் மோதியுள்ளன. அதில் கொல்கத்தா நைட் ரைடர்ஸ் அணி 10 முறையும், சன்ரைசர்ஸ் ஹைதராபாத் அணி 7 முறையும் வெற்றி பெற்றுள்ளது.

நேருக்கு நேர்

மைதானம்:

இன்றைய போட்டி நடைபெறவுள்ள அபுதாபி மைதானமானது, பந்து வீச்சுக்குச் சாதகமான மைதானமாகும். இதனால் இன்றைய ஆட்டத்தில் பந்து வீச்சாளர்கள் மீதான எதிர்பார்ப்பு அதிகரித்துள்ளது. அதிலும் சுழற்பந்து வீச்சாளர்களுக்கு சாதகமான மைதானம் என்பதால், இரு அணியிலும் உள்ள நட்சத்திர சுழற்பந்துவீச்சாளர்கள் மீது ரசிகர்களின் கவனம் திரும்பியுள்ளது.

ஷேக் சயீத் சர்வதேச கிரிக்கெட் மைதானம்

உத்தேச அணி:

கேகேஆர்: தினேஷ் கார்த்திக் (கே), சுனில் நரைன், சுப்மன் கில், நிதீஷ் ராணா, இயன் மோர்கன், ஆண்ட்ரே ரஸ்ஸல், பாட் கம்மின்ஸ்,நிகில் நாயக் குல்தீப் யாதவ், சந்தீப் வாரியர், ஷிவம் மாவி.

எஸ்.ஆர்.எச்: டேவிட் வார்னர்(கேப்டன்), ஜானி பேர்ஸ்டோவ், கேன் வில்லியம்சன்/ முகமது நபி, மனீஷ் பாண்டே, விஜய் சங்கர், பிரியாம் கார்க், அபிஷேக் சர்மா, ரஷித் கான், புவனேஷ்வர் குமார், நடராஜன், சந்தீப் சர்மா.

இதையும் படிங்க:நடிகை அனுஷ்கா சர்மா சர்ச்சை: கவாஸ்கர் விளக்கம்...!