ராஜஸ்தான் பந்துவீச்சை சிதறடித்து கொல்கத்தா அதிரடி வெற்றி!

ஜெய்ப்பூர் : ராஜஸ்தான் ராய்ல்ஸ் அணியை 8 விக்கெட்டுகள் வித்தியாசத்தில் கொல்கத்தா நைட் ரைடர்ஸ் அணி வீழ்த்தியது.

இன்றைய ஐபிஎல் போட்டியில் ரஹானே தலைமையிலான ராஜஸ்தான் ராயல்ஸ் அணியை எதிர்த்து தினேஷ் கார்த்திக் தலைமையிலான கொல்கத்தா நைட் ரைடர்ஸ் அணி மோதின. இதில் டாஸ் வென்ற கொல்கத்தா அணி பந்துவீச்சைத் தேர்வு செய்தது. பின்னர் முதல் பேட்டிங் ஆடிய ராஜஸ்தான் அணி 20 ஓவர்களில் 3 விக்கெட்டுகள் இழப்பிற்கு 139 ரன்கள் எடுத்தது. அதிகபட்சமாக ஸ்மித் 73 ரன்கள் எடுத்தார்.

பின்னர் 140 ரன்கள் எடுத்தால் வெற்றி என்ற எளிய இலக்குடன் கொல்கத்தா அணியின் சுனில் நரைன் - கிறிஸ் லின் களமிறங்கினர். தொடக்கம் முதலே பட்டாசாய் வெடித்த சுனில் நரைன், கெளதம் வீசிய இரண்டாவது ஓவரில் ஹாட்ரிக் பவுண்டரி உட்பட 22 ரன்களை அடித்தார்.

கொல்கத்தா அணி 4.1 ஓவர்களில் 50 ரன்களை அதிரடியாய் கடக்க, ராஜஸ்தான் பந்துவீச்சாளர்கள் எப்படி பந்துவீசுவது என குழம்பினர். தொடர்ந்து அதிரடி காட்டிய சுனில் நரைன் 8-வது ஓவரில் இரண்டு சிக்ஸர்கள் உட்பட 16 ரன்கள் சேர்த்தார்.

முதல் விக்கெட்டுக்கு 8.3 ஓவர்களில் 91 ரன்களை சேர்த்திருந்த நிலையில், சுனில் நரைன் 25 பந்துகளில் 47 ரன்கள் எடுத்து ஆட்டமிழந்தார். அதில் 6 பவுண்டரியும், 3 சிக்ஸர்களும் அடங்கும்.

சுனில் நரைன்

பின்னர் கிறிஸ் லின் - உத்தப்பா இணை தொடர்ந்து ராஜஸ்தான் பந்துவீச்சை சிதறடித்தது. இதற்கிடையே, கிறிஸ் லின் தனது 7-வது அரைசதத்தை பூர்த்தி செய்தார். தொடர்ந்து விளையாடிய லின், 32 பந்துகளில் 6 பவுண்டரிகள், 3 சிக்ஸர்களோடு சேர்த்து 50 ரன்கள் எடுத்து வெளியேறினார்.

கிறிஸ் லின்

தொடர்ந்து அதிரடியாக ஆடிய உத்தப்பா - கில் இணை 13.5 ஓவர்களில் இலக்கை அடைந்தது. இறுதிவரை ஆடிய உத்தப்பா 16 பந்துகளில் 26 ரன்களும், கில் 6 ரன்களும் எடுத்தனர். இதனால், ராஜஸ்தான் அணியை 8 விக்கெட்டுகள் வித்தியாசத்தில் கொல்கத்தா அணி வீழ்த்தியது. இந்த வெற்றியின் மூலம் கொல்கத்தா அணி புள்ளி பட்டியலில் முதலிடம் பிடித்தது.