மும்பை: இந்திய அணி மூன்று போட்டிகள் கொண்ட ஒருநாள் தொடரை விளையாட ஜிம்பாப்வே நாட்டிற்கு வரும் ஆகஸ்ட் மாதம் சுற்றுப்பயணம் மேற்கொள்ள உள்ளது. ஆக. 18ஆம் தேதி முதல் போட்டியும், ஆக. 20, 22 ஆகிய தேதிகளில் அடுத்தடுத்த போட்டிகளிலும் நடைபெறுகின்றன. இந்த மூன்று போட்டிகளும் ஜிம்பாப்வே நாட்டின் தலைநகரான ஹராரேவில் உள்ள ஹராரே விளையாட்டு மைதானத்தில் நடைபெற உள்ளது. இந்த நிலையில், ஒருநாள் தொடருக்கான இந்திய அணியை பிசிசிஐ இன்று (ஜூலை 30) அறிவித்துள்ளது.
சமீபத்தில், நடந்து முடிந்த மேற்கு இந்தியா தீவுகளுக்கு எதிரான ஒருநாள் தொடரில் இந்திய அணியை வழிநடத்திய ஷிகர் தவான் இத்தொடரிலும் கேப்டனாக தொடர்கிறார். மேற்கு இந்திய தீவுகள் அணியுடனான தொடரில் இடம்பெற்றிருந்த சூர்யகுமார் யாதவ், ஷ்ரேயஸ் ஐயர், ஜடேஜா, யுஸ்வேந்திர சஹால், அர்ஷ்தீப் சிங் ஆகியோருக்கு இதில் ஓய்வளிக்கப்பட்டுள்ளது.
முந்தைய தொடரை போலவே விராட் கோலி, ரோஹித் சர்மா, ரிஷப் பந்த், புவனேஷ்வர் குமார், பும்ரா, ஷமி ஆகியோருக்கு ஒருநாள் அணியில் ஓய்வு நீட்டிக்கப்பட்டுள்ளது. மேலும், ராகுல் திரிபாதி, வாஷிங்டன் சுந்தர், குல்தீப் யாதவ், தீபக் சஹார் ஆகியோர் அணியில் சேர்க்கப்பட்டுள்ளனர்.