புனே: ஐசிசி உலகக் கோப்பை கடந்த 5ஆம் தேதி தொடங்கி நடைபெற்று வரும் நிலையில், இன்று (அக்டோபர் 19) அதன் 17வது லீக் போட்டி நடைபெற்று முடிந்தது. இந்த போட்டியில் இந்திய அணி 7 விக்கெட்கள் வித்தியாசத்தில் வங்கதேசம் அணியை வீழ்த்தி வெற்றி பெற்றது. இந்த ஆட்டத்தில் விராட் கோலி சதம் அடித்து மிரட்டினார். சதம் அடித்தது மட்டுமல்லாமல் அதன் மூலம் பல சாதனைகளையும் படைத்துள்ளார் விராட் கோலி.
முதலில் பேட்டிங் செய்த வங்கதேசம் அணி 50 ஓவர்கள் முடிவில், 8 விக்கெட்கள் இழப்பிற்கு 256 ரன்கள் எடுத்தது. இதனைத் தொடர்ந்து களம் இறங்கிய இந்திய அணி, தொடக்கம் முதலே அற்புதமாக விளையாடியது. தொடக்க வீரரான ரோஹித் சர்மா அரைசதம் நோக்கி நெருங்கிய வேளையில் எதிர்பாராதவிதமாக 48 ரன்களில் ஆட்டமிழந்து வெளியேறினார்.
இதனைத் தொடர்ந்து களம் புகுந்த விராட் கோலி தனது வழக்கமான நிதான ஆட்டத்தின் மூலம் அரைசதம் அடித்தார். அதைத் தொடர்ந்து சதமும் விளாசி அசத்தினார். இறுதியில், இந்திய அணியும் 7 விக்கெட்கள் வித்தியாசத்தில் வங்கதேசத்தை வீழ்த்தியது. விராட் கோலி இந்த போட்டியில் சதம் விளாசியதன் மூலம் பல சாதனைகளை படைத்துள்ளார்.