கவுகாத்தி : இந்தியா சுற்றுப்பயணம் மேற்கொண்டு உள்ள ஆஸ்திரேலிய அணி தலா 5 போட்டிகள் கொண்ட ஒருநாள் கிரிக்கெட் மற்றும் டி20 கிரிக்கெட் தொடரில் விளையாடி வருகிறது.
இதில் ஒருநாள் கிரிக்கெட் போட்டி உலக கோப்பை கிரிக்கெட் தொடருக்கு முன்னதாக நடந்து முடிந்தது. தற்போது 5 போட்டிகள் கொண்ட டி20 தொடர் நடைபெற்று வருகிறது. இதில் முதலாவது டி20 கிரிக்கெட் போட்டி கடந்த நவம்பர் 23ஆம் தேதி விசாகப்பட்டினம் மைதானத்தில் நடைபெற்றது.
அந்த ஆட்டத்தில் கடைசி பந்தில், இந்திய அணி 2 விக்கெட் வித்தியாசத்தில் த்ரில் வெற்றி பெற்றது. அதைத் தொடர்ந்து கடந்த நவம்பர் 26ஆம் தேதி திருவனந்தபுரத்தில் நடைபெற்ற ஆஸ்திரேலிய அணிக்கு எதிரான 2வது டி20 கிரிக்கெட் போட்டியில் இந்திய அணி 44 ரன்கள் வித்தியாசத்தில் வெற்றி பெற்றது.
5 போட்டிகள் தொடரை 2-க்கு 0 என்ற கணக்கில் இந்திய அணி கைப்பற்றியது. இந்நிலையில், இவ்விரு அணிகளுக்கு இடையிலான 3வது டி20 கிரிக்கெட் போட்டி அசாம் மாநிலம் கவுகாத்தியில் உள்ள பரசபரா கிரிக்கெட் மைதானத்தில் இன்று (நவ. 28) நடைபெறுகிறது. இந்த ஆட்டத்திலும் வென்று தொடரை 3-க்கு 0 என்ற கணக்கில் வெல்ல இந்திய அணி திட்டமிட்டு உள்ளது.
இந்திய அணியை பொறுத்தவரை பேட்டிங், பந்துவீச்சு, பீல்டிங் என அனைத்து துறைகளும் நல்ல நிலையில், பேட்டிங்கில் தொடக்க வீரர் யாஷஸ்வி ஜெய்ஸ்வால், ருதுராஜ் கெய்க்வாட், சூர்யகுமார் யாதவ், ரிங்கு சிங் உள்ளிட்டோர் நல்ல பார்மில் உள்ளனர். அதேநேரம் பந்துவீச்சில் பிரசித் கிருஷ்ணா, ரவி பிஷ்னாய், முகேஷ் குமார் சிறப்பாக விளையாடி வருகின்றனர்.