இந்தூர் :இந்தியா சுற்றுப்பயணம் மேற்கொண்டு உள்ள ஆப்கானிஸ்தான் அணி 3 போட்டிகள் கொண்ட டி20 கிரிக்கெட் தொடரில் விளையாடி வருகிறது. இவ்விரு அணிகளுக்கு இடையிலான முதலாவது டி20 கிரிக்கெட் போட்டி கடந்த ஜனவரி 11ஆம் தேதி பஞ்சாப்பின், மொஹாலி மைதானத்தில் நடைபெற்றது.
இந்த ஆட்டத்தில் 6 விக்கெட் வித்தியாசத்தில் இந்திய அணி அபார வெற்றி பெற்று தொடரை 1-க்கு 0 என்ற கணக்கில் முன்னிலை பெற்றது. இந்நிலையில், இவ்விரு அணிகளுக்கு இடையிலான 2வது டி20 கிரிக்கெட் போட்டி மத்திய பிரதேசம் மாநிலத்தில் உள்ள இந்தூர் மைதானத்தில் இன்று (ஜன. 14) நடைபெறுகிறது. இந்த ஆட்டத்திலும் வெற்றி பெற்று தொடரை கைப்பற்றும் முனைப்பில் இந்திய வீரர்கள் உள்ளனர்.
அதேநேரம் இந்த ஆட்டத்தில் வெற்றி பெற்றால் மட்டுமே தொடரில் நீடிக்க முடியும் என்பதால் வெற்றிக்காக ஆப்கான் வீரர்கள் போராடுவார்கள் என்பதில் துளியும் சந்தேகமில்லை. இந்திய அணியில் நட்சத்திர வீரர் விராட் கோலி இந்த ஆட்டத்தில் களமிறங்குவார் என தெரிகிறது. இதற்கான விமானம் மூலம் இந்தூர் வந்த அவர் இந்திய அணியுடன் இணைந்தார்.
தனிப்பட்ட காரணங்களுக்காக ஜனவரி 11ஆம் தேதி நடைபெற்ற முதலாவது டி20 கிரிக்கெட் போட்டியில் அவர் விளையாட முடியாமல் போனது. ஏறத்தாழ 14 மாதங்களுக்கு பின் சர்வதேச டி20 கிரிக்கெட் போட்டியில் விராட் கோலி களமிறங்குவதால் ஆட்டத்தில் அனல் பறக்கும் என ரசிகர்க்ள் எதிர்பார்த்து காத்திருக்கின்றனர்.