பர்மிங்ஹாம் (இங்கிலாந்து):கடந்தாண்டு ஆகஸ்ட் - செப்டம்பர் மாதங்களில் 5 போட்டிகள் கொண்ட டெஸ்ட் தொடரை விளையாட இந்திய அணி இங்கிலாந்திற்கு சுற்றுப்பயணம் மேற்கொண்டது. அதில், நான்கு போட்டிகள் நடைபெற்ற நிலையில், ஐந்தாவது போட்டியின்போது இந்திய வீரர்களுக்கு கரோனா தொற்று ஏற்பட்டதால் அந்த ஆட்டம் ரத்துசெய்யப்பட்டது.
தொடரில் இந்திய அணி 2 -1 என்ற கணக்கில் முன்னிலையில் இருந்தது. மேலும், தொடரின் வெற்றியை தீர்மானிக்க கடைசி போட்டிக்கு பதிலாக மற்றொரு போட்டி நடத்தப்படும் என இருநாட்டு கிரிக்கெட் வாரியங்களும் அறிவித்திருந்தன. இதைத்தொடர்ந்து, இந்திய அணி தற்போது இங்கிலாந்துக்கு சுற்றுப்பயணம் மேற்கொண்டுள்ளது.
பும்ரா கேப்டன்: விடுபட்ட அந்த ஒரு டெஸ்ட் போட்டி மட்டுமல்லாமல் டி20, ஒருநாள் தொடர்களையும் இங்கிலாந்து அணியுடன் இந்தியா விளையாட உள்ளது. இந்நிலையில், டெஸ்ட் தொடரின் 5ஆவது போட்டி பர்மிங்ஹாம் நகரில் உள்ள எட்ஜ்பாஸ்டன் கிரிக்கெட் மைதானத்தில் இன்று நடைபெறுகிறது. கேப்டன் ரோஹித் சர்மாவுக்கு கரோனா தொற்று ஏற்பட்டுள்ளதால், ஜஸ்பிரித் பும்ரா கேப்டனாக செயல்படுவார் எனத் தெரிகிறது.
ரோஹித் - ராகுல் மிஸ்ஸிங்: கடந்தாண்டு இதே தொடரில், விராட் கோலி கேப்டனாக செயல்பட்டபோது அணியின் முகம் வேறாக இருந்தது. இந்த ஓராண்டுக்குள் பல மாற்றங்களை கண்டுவிட்ட இந்திய அணி, இங்கிலாந்து மண்ணில் நான்காவது முறையாக டெஸ்ட் தொடரை வெல்லும் முனைப்பில் உள்ளது. இதற்கு முன், 1971, 1986, 2007 ஆகிய ஆண்டுகளில் இந்தியா, இங்கிலாந்தை டெஸ்ட் தொடரை வென்றுள்ளது.
கடந்தாண்டு நடந்த 4 போட்டிகளிலும், ஓப்பனர்களாக ராகுல் - ரோஹித் சிறப்பான ஆட்டத்தை வெளிப்படுத்தினர். இருவரும் சேர்ந்து 683 ரன்களை சேர்த்து, இந்த தொடரில் இந்திய அணியின் மொத்த ஸ்கோரில் 34 சதவீதத்தை இந்த இணை ஆக்கிரமித்துள்ளது.
ஆனால், தற்போது தொடை பகுதியில் ஏற்பட்ட காயம் காரணமாக அறுவை சிகிச்சை மேற்கொண்டுள்ள ராகுலும், கரோனா காரணமாக ரோஹித்தும் இல்லாததது பெரும் பின்னடைவை ஏற்படுத்தியுள்ளது. மேலும், இன்றைய போட்டியில், சுப்மன் கில்லுடன் ஓப்பனராக புஜாரா இறங்குவார் என கூறப்படுகிறது.
ஓப்பனிங்கில் யார் யார்?: இருப்பினும், ஸ்ரீகர் பாரத் (அ) மயாங்க் அகர்வால் ஆகியோரில் யாருக்குக்காவது வாய்ப்பளிக்கப்படுமா என்ற எதிர்பார்ப்பும் அனைவரிடத்திலும் உள்ளது. ஓப்பனர்களாக இறங்குபவர்களுக்கு ஆண்டர்சன் - பிராட் ஆகியோரின் ஓப்பனிங் ஸ்பெல்லை சமாளிக்க வேண்டிய முக்கிய பொறுப்பு உள்ளது. எனவே, மயாங்க், புஜாரா போன்ற அனுபவமிக்கவர்களையே ஓப்பனிங்கில் இறக்க அணி நிர்வாகம் விரும்பும்.