இரண்டாவது அரையிறுதி - இங்கிலாந்துக்கு 224 ரன்கள் இலக்கு நிர்ணயித்த ஆஸி.

உலகக்கோப்பை கிரிக்கெட் தொடரில் இன்று நடைபெற்றுவரும் இங்கிலாந்து அணிக்கு எதிரான இரண்டாவது அரையிறுதிப்போட்டியில், முதலில் பேட்டிங் செய்த ஆஸ்திரேலியா அணி 223 ரன்களுக்கு ஆட்டமிழந்தது.

இங்கிலாந்தில் நடைபெற்றுவரும் உலகக்கோப்பை கிரிக்கெட் தொடரின் இரண்டாவது அரையிறுதிப்போட்டி இன்று பர்மிங்ஹாம் நகரில் உள்ள எட்ஜ்பேஸ்டன் மைதானத்தில் நடைபெற்று வருகிறது. இதில் டாஸ் வென்று ஆஸ்திரேலிய அணி பேட்டிங்கை தொடங்கியபோது கேப்டன் ஆரோன் பிஞ்ச் 0, வார்னர் 9 என அடுத்தடுத்து விக்கெட்டுகளை பறிகொடுத்ததால் அந்த அணி 14 ரன்களுக்கு மூன்று விக்கெட்டுகளை இழந்து தடுமாறியது.

இந்த சூழ்நிலையில் ஜோடி சேர்ந்த ஸ்டீவ் ஸ்மித் - அலெக்ஸ் கேரி இணை பொறுப்பான ஆட்டத்தை வெளிப்படுத்தி அணியை சரிவில் இருந்து மீட்டனர். அந்த ஜோடி நான்காவது விக்கெட்டிற்கு 103 ரன்கள் எடுத்திருந்தபோது அலெக்ஸ் கேரி 46 ரன்னில் அடில் ரஷித் சுழலில் ஆட்டமிழந்தார். அதே ஓவரின் இறுதிப் பந்தில் ஸ்டாஸ்னிஸ் 0 ரன்னில் ஆட்டமிழந்து ஏமாற்றினார்.

ஸ்மித் - அலெக்ஸ் கேரி

பின்னர் சிறிது நேரம் தாக்குப்பிடித்த மேக்ஸ்வெல் 22 ரன்னில் பெவிலியன் திரும்பினார். ஒருமுனையில் விக்கெட்டுகள் சரிந்தாலும் மறுமுனையில் நிலைத்து ஆடிய அதிரடி வீரர் ஸ்மித் 85 ரன்கள் (119 பந்துகள், 6 பவுண்டரிகள்) எடுத்தநிலையில் துரதிர்ஷ்டவசமாக ரன்-அவுட்டாகினார். அவரைத் தொடர்ந்து மிட்சல் ஸ்டார்க் 29 ரன்னில் ஆட்டமிழந்தார்.

இறுதியில் ஆஸ்திரேலிய அணி 49 ஓவர்களில் அனைத்து விக்கெட்டுகளையும் இழந்து 223 ரன்களை எட்டியது.

இங்கிலாந்து பந்துவீச்சீல் வோக்ஸ், அடில் ரஷித் தலா மூன்று விக்கெட்டுகளையும், ஜோப்ரா ஆர்ச்சர் 2 விக்கெட்டையும் கைப்பற்றினார். இதனால் இறுதிப்போட்டிக்கு தகுதி பெற இங்கிலாந்து அணிக்கு 224 ரன்கள் வெற்றி இலக்காக நிர்ணயிக்கப்பட்டுள்ளது.