அயர்லாந்து கிரிக்கெட் அணி வெஸ்ட் இண்டீஸில் சுற்றுப்பயணம் மேற்கொண்டு மூன்று ஒருநாள், மூன்று டி20 போட்டிகளில் விளையாடுகிறது. அதன்படி தற்போது நடைபெற்றுவரும் ஒருநாள் தொடரின் முதல் போட்டியில் வெஸ்ட் இண்டீஸ் அணி வெற்றி பெற்றிருந்த நிலையில் இரு அணிகளுக்கும் இடையேயான இரண்டாவது போட்டி நேற்று பார்படாஸில் நடைபெற்றது.
இதில் டாஸ் வென்று பேட்டிங் செய்த அயர்லாந்து அணி, 50 ஓவர்களில் ஒன்பது விக்கெட் இழப்பிற்கு 237 ரன்களை எடுத்தது. அந்த அணியில் அதிகபட்சமாக பால் ஸ்டிர்லிங் 63, சிமி சிங் 34 ரன்கள் எடுத்தனர். வெஸ்ட் இண்டீஸ் பந்துவீச்சில் அல்ஜாரி ஜோசப் 4, ஷெல்டன் காட்ரல் 3 விக்கெட்டுகளைக் கைப்பற்றினர்.
இதைத் தொடர்ந்து துரத்தலை தொடங்கிய வெஸ்ட் இண்டீஸ் அணி தொடக்கத்திலேயே எவின் லீவிஸ் 7, ஷிம்ரன் ஹெட்மயர் 6, பிராண்டன் கிங் 0 என வரிசையாக விக்கெட்டுகளை இழந்து தடுமாறியது. பின்னர் சாய் ஹோப் உடன் கைக்கோர்த்த நிக்கோலஸ் பூரான் தனது பாணியில் ஆட்டத்தை வெளிப்படுத்தினார். இந்த இணை நான்காவது விக்கெட்டுக்கு 52 ரன்கள் சேர்த்திருந்த நிலையில், ஹோப் 25 ரன்னில் ஆட்டமிழந்தார்.
அதன்பின் சிறப்பாக விளையாடிய பூரான் 52 ரன்கள் எடுத்து பெவிலியன் திரும்பினார். இதே வேளையில் கேப்டன் பொல்லார்டு அதிரடியாக விளையாடி 32 பந்துகளில் 4 சிக்சர்கள், இரண்டு பவுண்டரிகள் உள்பட 40 ரன்கள் எடுத்து பேரி மெக்கார்தி பந்தில் அவரிடமே பிடிபட்டார்.