ஒருநாள் போட்டியில் முதல் இரட்டை சதம் அடித்தது சச்சின் கிடையாது; ஆஸி. வீராங்கனை கிளார்க்தான்!

ஒருநாள் கிரிக்கெட் போட்டியில் இந்திய ஜாம்பவான் வீரர் சச்சின் டெண்டுல்கருக்கு முன்னரே, ஆஸ்திரேலிய மகளிர் அணியின் முன்னாள் கேப்டன் பெலின்டா கிளார்க் இச்சாதனை படைத்து இன்றோடு 22 ஆண்டுகள் நிறைவடைகின்றன.

கிரிக்கெட் ரசிகர்களிடம் ஒருநாள் போட்டியில் முதலில் யார் இரட்டை சதம் அடித்தார்கள் என்ற கேள்வியைக் கேட்டால் பெரும்பாலான ரசிகர்கள் சச்சின் என்றுதான் கண்ணை மூடிக்கொண்டு பதிலை தெரிவிப்பார்கள். இவ்வளவு ஏன், ஒருமுறை பாலிவுட் சூப்பர்ஸ்டார் அமிதாப் பச்சன் தொகுத்து வழங்கும் crorepati (கோடீஸ்வரன்) நிகழ்ச்சியில் சில ஆண்டுகளுக்கு முன் இந்தக் கேள்வி கேட்கப்பட்டது.

பலரும் சச்சின் என்றுதான் நினைத்தனர். ஆனால், அதுதான் தவறான பதிலாக இருந்தது. பொதுவாக எந்த ஒரு சாதனையும் முதலில் யார் படைக்கிறார்களோ அவர்களது பெயர்தான் நம் நினைவில் இருக்கும் என்பது இதற்கு காரணமாக எடுத்துக்கொள்ளலாம். ஆனால், சச்சினுக்கு முன்னதாகவே இச்சாதனையை முதலில் எட்டியது ஆஸ்திரேலிய மகளிர் அணியின் முன்னாள் கேப்டன் பெலின்டா கிளார்க்தான்.

பெலின்டா

1997இல் இந்தியாவில் நடைபெற்ற மகளிருக்கான உலகக்கோப்பை கிரிக்கெட் தொடரை ஆஸ்திரேலிய அணியை நான்காவது முறையாக வென்றது. இதில், டென்மார்க் அணிக்கு எதிராக மும்பையில் நடைபெற்ற லீக் போட்டியில் முதலில் பேட்டிங் செய்த ஆஸ்திரேலிய அணி 50 ஓவர்களில் மூன்று விக்கெட்டுகளை மட்டுமே இழந்து 412 ரன்களை குவித்தது. ஆஸ்திரேலிய அணியின் தொடக்க வீராங்கனையாக களமிறங்கிய பெலின்டா கிளார்க், தனது அசாத்தியமான பேட்டிங்கால் 22 பவுண்டரிகள் என 155 பந்துகளில் 229 ரன்களுடன் இறுதிவரை ஆட்டமிழக்காமல் களத்தில் இருந்தார்.

இதன்மூலம், ஒருநாள் கிரிக்கெட்டில் இரட்டை சதம் அடித்த முதல் நபர் என்ற சாதனையை படைத்தார். இவர் இச்சாதனை படைத்து இன்றோடு 22 ஆண்டுகள் கடந்துவிட்டன. பெலின்டா கிளார்க் இச்சாதனை படைத்து 13 ஆண்டுகள் ஆனபிறகே, சச்சின் 2010இல் இரட்டை சதம் அடித்தார். சச்சின் 2010 பிப்ரவரி 24ஆம் தேதி குவாலியரில் நடைபெற்ற தென் ஆப்பிரிக்காவுக்கு எதிரான இரண்டாவது ஒருநாள் போட்டியில் அவர் இந்த மைல்கல்லை எட்டினார்.

அப்போது வர்ணனையாளராக இருந்த ரவிசாஸ்திரி, 'First man in the planet to reach 200 And its the super man from India' என தனது கம்பீர குரலால் அந்தத் தருணத்துக்கு அழகு சேர்த்தார்.

சச்சினுக்கு முன் இச்சாதனையை பெலின்டா கிளார்க் எட்டியதால் மகளிர் கிரிக்கெட்டின் 'Super Women' என்று ரசிகர்கள் கருத்துத் தெரிவிக்கின்றனர். தற்போதைய மாடர்ன்டே கிரிக்கெட்டில் பேட்ஸ்மேன்களுக்கு சாதகமாகப் பல்வேறு விதிமுறைகள் இருப்பதால், ஒருநாள் போட்டியில் இரட்டை சதம் அடிப்பது என்பது எளிதான செயல் ஆகிவிட்டாலும் 1990இன் பிற்பாதியில் இதனை எட்டியது இன்றளவும் அனைவருக்கும் பிரமிப்பாகத்தான் இருக்கிறது.

இதையும் படிங்க:சம்பவம் மட்டுமல்ல அங்கே சரித்திரமும் படைத்தவர் மிதாலி ராஜ்!