விராட் கோலி தலைமையிலான இந்திய அணி வெஸ்ட் இண்டீஸூக்கு சுற்றுப்பயணம் செய்துள்ளது. இதில், முதலில் நடைபெற்ற மூன்று டி20 போட்டிகள் கொண்ட தொடரை இந்திய அணி வென்றது. இந்நிலையில், இவ்விரு அணிகளுக்கு இடையிலான முதல் ஒருநாள் போட்டி இன்று கயானாவில் நடைபெற்றுவருகிறது.
ஆடுகளம் ஈரப்பதத்துடன் இருந்ததால், உரிய நேரத்தில் போட்டி தொடங்கவில்லை. இதைத்தொடர்ந்து, டாஸ் வென்ற இந்திய அணியின் கேப்டன் கோலி முதலில் பந்துவீச தீர்மானித்தார். டி20 தொடரில் இந்திய அணியில் இடம்பெற்ற நவ்தீப் சைனி, மனீஷ் பாண்டே, கே.எல்.ராகுல் ஆகியோருக்கு பதிலாக ரோகித் ஷர்மா, ஸ்ரேயாஸ் ஐயர், கேதர் ஜாதவ் ஆகிய மூன்று பேருக்கும் வாய்ப்பு வழங்கப்பட்டுள்ளது.
இதைத்தொடர்ந்து, இப்போட்டியில் முதலில் பேட்டிங் செய்துவரும் வெஸ்ட் இண்டீஸ் அணி 5.4 ஓவர்களில் விக்கெட் இழப்பின்றி ஒன்பது ரன்களை எடுத்தபோது, மழை பெய்தது. இதனால், ஆட்டம் 40 ஓவர்களாக குறைக்கப்பட்டுள்ளது. தொடக்க வீரர் கெயில் மூன்று ரன்களிலும், லீவிஸ் நான்கு ரன்களிலும் களத்தில் இருக்கின்றனர்.