ஸ்மித் தலையில் அடித்த பவுன்சர்... அந்த நிமிடத்தை நினைவுகூரும் வார்னர்!

ஆஷஸ் தொடரின்போது ஸ்மித்தின் தலையில் பந்து அடித்த அந்த தருணம் பற்றி ஆஸ்திரேலிய வீரர் டேவி வார்னர் பேசியுள்ளார்.

அமேஸான் ப்ரைம் சார்பாக தி டெஸ்ட் என்ற ஆவணப்படம் வெளியாகி ரசிகர்களிடையே பெரும் வரவேற்பைப் பெற்றுவருகிறது. அதில் பந்தை சேதப்படுத்திய விவகாரத்திற்கு பின் ஆஸ்திரேலியா அணி எவ்வாறு மீண்டது, உலகக்கோப்பைத் தொடரின்போது ஆஸ்திரேலிய அணியின் மனநிலை, ஆஷஸ் தொடர் என பல்வேறு விஷயங்கள் பற்றி ஆஸ்திரேலிய வீரர்கள் பகிர்ந்துள்ளனர்.

ஆர்ச்சர்

அதில் ஆஷஸ் தொடரின்போது ஸ்டீவ் ஸ்மித் - ஜோஃப்ரா ஆர்ச்சர் இருவருக்குமிடையே மிகப்பெரிய போட்டி உருவானது. இருவரில் யார் சிறப்பாக செயல்படுகிறார்கள் என்ற போட்டியின் மூலம் டெஸ்ட் கிரிக்கெட்டின் மகத்துவம் உலக கிரிக்கெட் ரசிகர்களுக்கு சென்று சேர்ந்தது. ஒரு நல்ல பேட்ஸ்மேனுக்கும், நல்ல பந்துவீச்சாளருக்கும் இடையே எழும் போட்டியால்தான் இன்று வரை கிரிக்கெட் விளையாட்டு சுழன்று கொண்டிருக்கிறது. அதுமீண்டும் களத்தில் நிரூபிக்கப்பட்டது.

அந்தத் தொடரின்போது ஆர்ச்சர் வீசிய ஒரு பவுன்சர் ஸ்டீவ் ஸ்மித் தலையில் அடித்தது. இதனால் ஸ்டீவ் ஸ்மித் களத்திலேயே கீழே விழுந்தார். அந்த நிமிடம் பற்றி ஆஸ்திரேலிய வீரர் வார்னர் பேசுகையில், '' ஸ்டீவ் கீழே விழுந்தபோது, மீண்டும் அது நடந்துவிடக்கூடாது என்று அனைவருமே வேண்டினோம். உண்மையை சொல்லவேண்டுமென்றால் அனைவருமே பதற்றம் கொண்டோம். அந்த நிமிடம் எங்கள் அனைவரையும் பயமுறுத்தியது.

பவுன்சரால் ஒரு உயிர் போகும் என்று அதுவரை நாங்கள் யோசித்ததே இல்லை. வளரும்போது சரி, சர்வதேச கிரிக்கெட்டில் ஆடியபோதும் சரி... பில் ஹியூஸ் மறைவுக்கு பின் பவுன்சரின் தீவிரத்தை அறிந்துகொண்டோம்'' என்றார்.

ஸ்மித்

2014ஆம் ஆண்டு ஆஸ்திரேலிய உள்நாட்டு கிரிக்கெட் தொடரின்போது வீசப்பட்ட ஒரு பவுன்சர் பந்து தலையில் பட்டதில் ஆஸ்திரேலிய வீரர் பில் ஹியூஸ் உயிரிழந்தார். அன்றிலிருந்து ஆஸ்திரேலிய கிரிக்கெட் வீரர்களின் பவுன்சர் பந்துகள் வீசுவதில் மாற்றம் ஏற்பட்டது.

பில் ஹியூஸின் மறைவு இன்று வரை ஆஸ்திரேலிய அணியின் மனநிலையில் தாக்கம் செலுத்திவருகிறது என்று ரசிகர்களுக்கும் இந்த ஆவணப்படத்தின் மூலம் தெரியவந்துள்ளது.

இதையும் படிங்க:#Ashes: இந்த ஆட்டம் போதுமா குழந்த! - பேட்ட ஸ்மித்