இந்தியா - இலங்கை அணிகளுக்கு இடையிலான தொடர் சாத்தியமற்றது - பிசிசிஐ!

தற்போது நிலவிவரும் அசாத்திய சூழல் காரணமாக ஜூலையில் இந்தியா - இலங்கை அணிகளுக்கு இடையிலான தொடர் நடைபெறுவது சாத்தியமற்றது என பிசிசிஐ அதிகாரி தெரிவித்துள்ளார்.

கோவிட்-19 பெருந்தொற்றின் காரணமாக இரண்டு மாதங்களுக்கு மேல் அனைத்து வகையான கிரிக்கெட் போட்டிகளும் ஒத்திவைக்கப்பட்டுள்ளன. இந்நிலையில் இந்தாண்டு ஜூலை மாதம் இலங்கையில் சுற்றுப்பயணம் மேற்கொள்ளவிருந்த இந்திய அணி, மூன்று ஒருநாள், மூன்று டி20 போட்டிகள் கொண்ட தொடரில் விளையாடுவதாக திட்டமிடப்பட்டிருந்தது.

ஆனால் கரோனா வைரஸின் அச்சுறுத்தல் காரணமாக பல கிரிக்கெட் தொடர்கள் ஒத்திவைக்கப்பட்டதைத் தொடர்ந்து, இந்தியா - இலங்கை அணிகள் இடையிலான தொடரும் ஒத்திவைக்கப்படும் என தகவல் வெளியாகியது. இதையடுத்து இலங்கை கிரிக்கெட் வாரியம், பிசிசிஐயிடம் இத்தொடர் நடைபெற வேண்டும் என மின்னஞ்சல் வாயிலாக வேண்டுகோள் விடுத்திருந்தது.

இந்நிலையில், பிசிசிஐ அதிகாரி ஒருவர் கூறுகையில், ‘இந்தியா - இலங்கை அணிகளுக்கு இடையிலான தொடர் ஜூலை மாதம் நடைபெறுவது சாத்தியமற்றது. தற்போது நாட்டில் நிலவும் அசாதாரண சூழல் காரணமாக விளையாட்டுப் போட்டிகளை நடத்துவது குறித்து நாங்கள் எந்த முடிவுகளையும் எடுக்கவில்லை.

இத்தொடரானது இரு நாட்டு கிரிக்கெட் வாரியங்களுக்கு மிகவும் முக்கியமானதாகும். ஆனால் வீரர்களுடைய பாதுகாப்பை உறுதி செய்வதும் எங்களுடைய கடமைகயாகும். அதிலும் நிறைய வீரர்கள் மும்பை, பெங்களூரு பகுதியில் வசித்துவருகின்றனர். அப்பகுதிகள் ஏற்கெனவே சிவப்பு மண்டலங்களாக உள்ள நிலையில், அங்குள்ள வீரர்கள் இத்தொடரில் பங்கேற்பது இயலாத காரியம்.

இருப்பினும் முடிந்த வரை பிசிசிஐ தங்களால் இயன்ற முயற்சிகளை மேற்கொண்டு வருகிறது. தற்போது இது சாத்தியமற்றது என்றாலும், பின் நாட்களில் இருநாட்டு கிரிக்கெட் வாரியங்களும் இணைந்து முடிவுகளை மேற்கொள்ளும் என்பதில் சந்தேகமில்லை’ என தெரிவித்துள்ளார்.

இதையும் படிங்க:'பார்வையாளர்களின்றி நடைபெறும் போட்டிகளை எண்ணி வீரர்கள் கவலையடைய வேண்டாம்'