19 வயதுக்கு உட்பட்டோருக்கான உலகக்கோப்பை ஒருநாள் கிரிக்கெட் தொடர் தென் ஆப்பிரிக்காவில் நடைபெற்றுவருகிறது. இன்று நடைபெற்ற இந்தத் தொடரின் 11ஆவது லீக் போட்டியில் நடப்பு சாம்பியன் இந்திய அணி, கத்துக்குட்டியான ஜப்பான் அணியை எதிர்கொண்டது. இப்போட்டியில் டாஸ் வென்ற இந்திய அணியின் கேப்டன் ப்ரியம் கார்க் முதலில் ஜப்பான் அணியை பேட்டிங் செய்ய பணித்தார்.
இப்போட்டியை அவர் விரைவில் முடித்திட வேண்டும் என்ற எண்ணத்தில் இந்த முடிவை எடுத்தாரோ என்று தெரியவில்லை. ஜப்பான் அணியின் பேட்ஸ்மேன்களின் பெயர் நினைவில் வைப்பதற்குளேயே அனைவரும் வரிசையாக அவுட்டாகினர்.
1,7,0,0,0,0,0,7,5,1,1 இது ஏதோ டெலிஃபோன் நம்பரோ அல்லது டிரான்சாக்ஷன் ஐடி நம்பரோ என நினைக்க வேண்டாம். இது ஜப்பான் வீரர்கள் எடுத்த ஸ்கோர்.
அணியின் தொடக்க வீரராக களமிறங்கிய கேப்டனும் விக்கெட் கீப்பருமான மார்கஸ் துர்கேட் முதல் ரன்னில் கார்த்திக் தியாகி பந்துவீச்சில் போல்டாக, அவரைத் தொடர்ந்து வந்த நீல் டேட் அடுத்த பந்திலேயே டக் அவுட்டானார். இதனால், ஜப்பான் அணி 4.4 ஓவர்களில் இரண்டு விக்கெட் இழந்து ஐந்து ரன்களை மட்டுமே எடுத்திருந்தது.
இப்படி ஆட்டத்தின் தொடக்கம் முதல் இறுதிவரை ஜப்பான் அணிக்கு சோதனையாகவே அமைந்தது. ஒருக்கட்டத்தில் 19 ரன்களுக்கு ஏழு விக்கெட்டை இழந்த ஜப்பான் அணி எப்படியோ தட்டுத்தடுமாறி 22.5 ஓவர்களில் 41 ரன்களுக்கு ஆல் அவுட்டானது. இதில், அணியின் மற்றொரு தொடக்க வீரர் ஷூ நோகுச்சி, ஆல்ரவுண்டர் கென்டோ டோபேல் ஆகியோர் தலா ஒரு பவுண்டரி உட்பட ஏழு ரன்களில் ஆட்டமிழந்தனர். ஜப்பான் அணி சார்பில் இந்த இரண்டு வீரர்கள் அடித்த ரன்களே அதிகபட்ச ஸ்கோராகும்.