தென் ஆப்பிரிக்காவை வீழ்த்திய இந்தியா!

19 வயதுக்குட்பட்டோரின் தென் ஆப்பிரிக்க அணிக்கு எதிரான முதல் ஒருநாள் போட்டியில் இந்திய அணி ஒன்பது விக்கெட்டுகள் வித்தியாசத்தில் வெற்றிபெற்றது.

19 வயதுக்குட்பட்ட இந்தியா - தென் ஆப்பிரிக்க அணிகளுக்கு இடையிலான மூன்று ஒருநாள் போட்டிகள் கொண்ட தொடர் தென் ஆப்பிரிக்காவில் நடைபெற்றுவருகிறது. இதில், இவ்விரு அணிகளுக்கு இடையிலான முதல் ஒருநாள் போட்டி கிழக்கு லண்டனில் நேற்று (டிசம்பர் 26) நடைபெற்றது.

இப்போட்டியில், டாஸ் வென்று முதலில் பேட்டிங் செய்த தென் ஆப்பிரிக்க அணி இந்திய அணியின் அபாரமான பந்துவீச்சை எதிர்கொள்ள முடியாமல் 48.3 ஓவர்களில் 187 ரன்களுக்கு ஆல் அவுட்டானது. அந்த அணியில் அதிகபட்சமாக, லூக் பெஃபோர்ட் 64 ரன்கள் அடித்தார். இந்திய அணி தரப்பில் ரவி பிஷ்னாய் மூன்று விக்கெட்டுகளையும் கார்த்திக் தியாகி, ஷுபங் ஹெக்டே ஆகியோர் தலா இரண்டு விக்கெட்டுகளையும் வீழ்த்தினர்.

இதைத் தொடர்ந்து, 188 ரன்கள் இலக்குடன் களமிறங்கிய இந்திய அணி 42.3 ஓவர்களில் ஒரு விக்கெட்டை இழந்து வெற்றி இலக்கை எட்டியது. இதன் மூலம், இந்திய அணி இப்போட்டியில் ஒன்பது விக்கெட்டுகள் வித்தியாசத்தில் வெற்றிபெற்று இந்தத் தொடரில் 1-0 என்ற கணக்கில் முன்னிலையில் உள்ளது.

இதையும் படிங்க:இஷாந்த் சர்மா வேகத்தில் 69 ரன்களுக்கு சுருண்ட ஹைதராபாத்!