'நான் ரெய்னா ரசிகன்...' - மனம்திறந்த ஜான்டி ரோட்ஸ்!

கேப்டவுன் ( தென் ஆப்ரிக்கா) : சென்னை அணியின் ரெய்னா ஃபீல்டிங்கிற்குத் தான் ரசிகன் என தென் ஆப்பிரிக்காவின் ஜான்டி ரோட்ஸ் தெரிவித்துள்ளார்.

கிரிக்கெட்டில் வெல்வதற்குப் பேட்டிங், பந்து வீச்சோடு சேர்த்து ஃபீல்டிங்கும் சிறப்பாக இருக்க வேண்டும். ஒரு ரன், இரண்டு ரன்களில் வெற்றியைத் தீர்மானிக்கும் போட்டிகளில் ஃபீல்டிங் பெரும் பங்கு வகிக்கும். 90களுக்குப் பிறகு சர்வதேச கிரிக்கெட்டில் ஃபீல்டிங்கின் முக்கியத்துவம் பற்றி அறிய வைத்தவர், தென் ஆப்பிரிக்காவின் ஜான்டி ரோட்ஸ்.

ஜான்டி ரோட்ஸ் இந்திய அணியின் ஆல் ரவுண்டர் ஜடேஜாவை, தற்போது சிறந்த ஃபீல்டராக இருக்கிறார் எனத் தெரிவித்துள்ளார். இவருடன் இந்திய அணியின் ரெய்னா இன்ஸ்டாகிராமில் உரையாடினார். அதில் இப்போதைய வீரர்களின் ஃபீல்டிங் பற்றி பேசப்பட்டது.

அதில், ''இந்திய அணியின் ஜடேஜா மிகச்சிறந்த கேட்ச்களை பிடித்துள்ளார். அதற்கு உறுதியுடன் இருப்பதும், எப்போது வேண்டுமானாலும் பந்து நம்மிடம் வரும் என விழிப்போடு காத்திருப்பதும் மட்டுமே, ஜடேஜா சிறப்பாக ஃபீல்டிங் செய்வதற்கு முழுமையான காரணம்.

சர்வதேச கிரிக்கெட்டில் ஃபீல்டிங்கின் முக்கியத்துவம் என்னால் மாறவில்லை. எனது ஃபீல்டிங்கிற்கு பிறகு அனைவரும் ஃபீல்டிங்கால் ஏற்படும் மாற்றத்தைக் கண்டுகொண்டனர்.

கடந்த சில ஆண்டுகளில் ஏபி டிவில்லியர்ஸ், மார்ட்டின் கப்தில், ஜடேஜா, பெவன் ஆகியோரை ரசித்துள்ளேன். ஜடேஜாவின் வேகம் எப்போதும் என்னை ஆச்சரியப்படுத்தும்.

2011ஆம் ஆண்டு உலகக்கோப்பையின் போது நீங்கள் (ரெய்னா) என்னை நினைவு படுத்தினீர்கள். உங்களின் ரசிகனாகவே இருந்தேன்... இருக்கிறேன்.

90களின் கிரிக்கெட்டிற்கும், இப்போதுள்ள கிரிக்கெட்டுக்கும் ஃபீல்டிங்கில் நிறையவே வித்தியாசங்கள் உள்ளன. அப்போது எல்லாம் அணிக்கு ஃபீல்டர்கள் எனப் பெரிதாக இருக்க மாட்டார்கள். ஆனால், இப்போது எல்லாம் அனைத்து அணிகளிலும் 2 சிறந்த ஃபீல்டர்கள் உள்ளார்கள். வீரர்களுக்கான ஃபிட்னெஸ் தரம் உயர்ந்துள்ளது.

விராட் கோலி வீரர்களுக்கான ஃபிட்னெஸ் தரத்தை, வேறு கட்டத்திற்கு எடுத்துச் சென்றுள்ளார்'' என்றார்.

இதையும் படிங்க:இந்தியா - இலங்கை அணிகளுக்கு இடையிலான தொடர் சாத்தியமற்றது - பிசிசிஐ!