கிரிக்கெட்டில் மலிங்காவிற்கு அடுத்தபடியாக யார்க்கர் கிங்காக வலம்வருபவர் இந்திய பந்துவீச்சாளர் பும்ரா. வித்தியாசமான பவுலிங் ஆக்ஷன், துல்லியமான யார்க்கர், ஸ்லோயர் பந்துகள் என பந்துவீச்சில் பல வெரைட்டிகளைத் தன் கையில் வைத்திருப்பார். ஐபிஎல் கிரிக்கெட்டில் கிடைத்த நல்ல அறிமுகத்தின் மூலம், 2016 ஆஸ்திரேலியாவுக்கு எதிரான ஒருநாள் போட்டியில் அறிமுகமானார்.
மூன்றே வருடங்களில் தற்போது உலகின் தலைசிறந்த பந்துவீச்சாளர்களில் ஒருவராக வளர்ந்துள்ளார். தனது மிரட்டலான பந்துவீச்சின் மூலம், நட்சத்திர பேட்ஸ்மேன்களையும் திணறடிக்கும் திறன் பெற்றவர். கடந்த ஆண்டு டெஸ்ட் கிரிக்கெட்டில் அறிமுகமான பும்ரா, இதுவரை 12 போட்டிகளில் மட்டுமே விளையாடி டெஸ்ட் தரவரிசைப் பட்டியலில் மூன்றாம் இடத்தில் இருக்கிறார். ஒருநாள் கிரிக்கெட் தரவரிசைப் பட்டியலில் முதலிடத்தில் தொடர்ந்து நீடிக்கிறார்.
விளையாட்டில் தற்போது சிறந்த வீரராகத் திகழும் பலரும், அவர்களது ஆரம்ப காலத்தில் வறுமையான வாழ்க்கையைதான் வாழ்ந்திருப்பார்கள். அந்தவகையில், பும்ராவின் கதையும் அப்படித்தான் அமைந்திருந்தது. லண்டனில் விளையாட்டுத் துறை சார்ந்த விழாவில் மும்பை இந்தியன்ஸ் அணியின் உரிமையாளர் நீடா அம்பானி பங்கேற்றார். அதில், நீடா அம்பானி பேசுகையில், திறமையானவர்கள் எங்கிருந்து வந்தாலும் வாழ்க்கையில் நிச்சயம் வெற்றி அடைவார்கள் என்று கூறி, பும்ரா குறித்த வீடியோவை வெளியிட்டார்.