இந்தியாவில் இம்மாதம் தொடங்கும் ஐபிஎல் தொடருக்காக அனைத்து அணி வீரர்களும் தீவிர வலைபயிற்சியில் ஈடுபட்டு வருகின்றனர். ஏற்கனவே சென்னை சூப்பர் கிங்ஸ் அணியின் கேப்டன் தோனி, சுரேஷ் ரெய்னா உள்ளிட்ட வீரர்கள் இம்மாத தொடக்கத்திலேயே சென்னைக்கு வந்து தங்களது பயிற்சிகளை தொடர்ந்து வருகின்றனர்.
அந்த வகையில் சென்னை அணியின் நட்சத்திர வீரரான ஹர்பஜன் சிங்கும் தனது பயிற்சிக்காக நேற்று மும்பையிலிருந்து, இண்டிகோ விமானத்தில் கோவைக்கு வந்துள்ளார். அப்போது தனது உடமைகளை சரிபார்த்துக் கொண்டிருந்த அவருக்கு பேரதிர்ச்சியாக, தனது கிட் பேக்கிலிருந்த பேட் காணாமல் போயிருப்பது தெரியவந்துள்ளது.
இதனையடுத்து தனது ட்விட்டர் பக்கத்தில், நான் நேற்று மும்பையிலிருந்து கோவைக்கு இண்டிகோ நிறுவனத்தின் விமானம் மூலம் வந்தேன். பின் எனது பையை நான் சோதனை செய்த போது அதிலிருந்த பேட் காணாமல் போகியுள்ளது. எனது பேட்டை திருடியவரை கண்டுபிடித்து அவருக்கு கடுமையான தண்டனை வழங்கும்படி மத்திய தொழில்துறை பாதுகாப்பு படையினரிடமும், இண்டிகோ நிறுவனத்திடமும் உதவி கேட்டிருந்தார்.