டெல்லி மாநில அரசுக்கு கவுதம் கம்பீர் ரூ.50 லட்சம் நிவாரணம்!

டெல்லி: கவுதம் கம்பீர் எம்.பி. டெல்லி மாநில அரசுக்கு தனது தொகுதி மேம்பாட்டு நிதியிலிருந்து ரூ.50 லட்சம் நிதியளிக்க முன்வந்துள்ளார்.

கரோனா (கோவிட்19) பாதிப்பு நோயாளிகளுக்கு சிகிச்சையளிக்கும் மருத்துவர் உள்ளிட்ட சுகாதாரப் பணியாளர்களுக்கு பாதுகாப்பு உபகரணங்கள் வாங்கும்பொருட்டு நிதியளிக்க வேண்டும் என மாநில துணை முதலமைச்சர் மணீஷ் சிசோடியா மக்களுக்கு வேண்டுகோள் விடுத்தார். இதை ஏற்று டெல்லி (கிழக்கு) தொகுதி எம்.பி.யான கவுதம் கம்பீர் தனது தொகுதி மேம்பாட்டு நிதியிலிருந்து ரூ.50 லட்சம் நிதியளிக்க முன்வந்துள்ளார்.

இதுதொடர்பாக அவர் மாநில முதலமைச்சர் அரவிந்த் கெஜ்ரிவாலுக்கு கடிதம் எழுதியுள்ளார். அந்தக் கடிதத்தில் இந்த நிதியை மருத்துவர் உள்ளிட்ட சுகாதாரப் பணியாளர்களுக்கு பாதுகாப்பு உபகரணங்கள் வாங்க அளிப்பதாக தெரிவித்துள்ளார். இதற்கிடையில் இது தொடர்பாக டெல்லி மாநில அரசு இதுவரை எந்தப் பதிலும் தெரிவிக்கவில்லை என கவுதம் கம்பீரின் உதவியாளர் ஒருவர் கூறினார்.

முன்னதாக கவுதம் கம்பீர் ட்விட்டரில், “ஆம் ஆத்மி அரசாங்கம் முதலைக் கண்ணீர் வடிக்கிறது” எனக் கூறியிருந்தார். மேலும் கரோனா பாதிப்பில் மக்கள் அவதியுறும் இந்த இக்கட்டான நேரத்தில் கோடிக்கணக்கான தொகையை விளம்பரங்களுக்கு செலவிடுவதாகவும் அவர் குற்றஞ்சாட்டியிருந்தார்

கரோனா பரவலை கட்டுப்படுத்தும் முன்னெச்சரிக்கை நடவடிக்கையாக, 21 நாட்களுக்கு நாடு முழுக்க பூட்டுதல் (லாக்டவுன்) அமலில் உள்ளது.

இதற்கிடையில் டெல்லி துணை முதலமைச்சர் மணீஷ் சிசோடியா, நிதியமைச்சர் நிர்மலா சீதாராமனுக்கு எழுதியிருந்த கடிதத்தில், “கரோனா தேசியப் பேரிடரை சமாளிக்கும் வகையில் மத்திய அரசு 17 ஆயிரம் கோடியை நிவாரணமாக அறிவித்துள்ளது.

எனினும் டெல்லி அரசாங்கத்துக்கு ஒரு பைசா கூட வழங்கவில்லை என குற்றஞ்சாட்டியிருந்தார். டெல்லியில் கரோனா பாதிப்புக்கு 500க்கும் மேற்பட்டவர்கள் பாதிக்கப்பட்டுள்ளனர்.