'மேரி மீ...' ரசிகையின் கோரிக்கைக்கு இலங்கை கிரிக்கெட் வீரர் அளித்த சுவாரஸ்ய பதில்

தன்னை திருமணம் செய்து கொள்ளும்படி மைதானத்தில் வைத்து கோரிக்கை விடுத்த ரசிகைக்கு இலங்கை கிரிக்கெட் வீரர் அளித்த பதில் இணையத்தில் வைரலாகிவருகிறது.

தென் ஆப்பிரிக்காவின் டி20 தொடரான மான்சி சூப்பர் லீக் டி20 தொடர் கடந்த நவம்பர் எட்டாம் தேதி முதல் நடைபெற்றது. மொத்தம் பத்து அணிகள் பங்கேற்ற இந்தத் தொடரின் இறுதிப் போட்டிக்கு பார்ல் ராக்ஸ், ஷவானே ஸ்பார்டன்ஸ் ஆகிய அணிகள் முன்னேறின.

இதனிடையே நேற்று நடைபெற்ற இறுதிப்போட்டியில் டூ பிளஸ்ஸிஸ் தலைமையிலான பார்ல் ராக்ஸ் அணி எட்டு விக்கெட்டுகள் வித்தியாசத்தில் வெற்றிபெற்று சாம்பியன் பட்டத்தைக் கைப்பற்றியது. இப்போட்டியில், பார்ல் ராக்ஸ் அணியில் இலங்கையைச் சேர்ந்த ஆல்-ரவுண்டர் இசுரு உதானாவும் இடம்பெற்றிருந்தார்.

அவர் ஃபீல்டிங் செய்துகொண்டிருந்த சமயத்தில் மைதானத்தில் இருந்த ரசிகை ஒருவர் என்னை திருமணம் செய்து கொள்ளுங்கள் உதானா என்ற வாக்கியங்கள் அடங்கிய பதாகைகளுடன் வந்திருந்தார். இதைக் கண்ட உதானா, மைதானத்தில் இருந்தவாரே தனது மோதிர விரலை உயர்த்திக் காண்பித்து தனக்கு ஏற்கனவே திருமணம் முடிந்துவிட்டது என்பதை அந்த ரசிகைக்கு தெரிவித்தார்.

இவற்றை மைதானத்தில் இருந்த ரசிகர் ஒருவர் தனது செல்போனில் படம்பிடித்து அதை இணையத்தில் பதிவிட்டார். தற்போது இந்த புகைப்படம் வேகமாகப் பரவிவருகிறது.