இந்தியாவுக்கு சுற்றுப்பயணம் மேற்கொண்டுள்ள ஆஸ்திரேலிய அணி ஐந்து போட்டிகள் கொண்ட ஒருநாள் தொடரில் பங்கேற்று விளையாடி வருகிறது. தற்போது 2-2 என சமநிலை வகிப்பதால், கடைசி ஒருநாள் போட்டி ரசிகர்களிடையே மிகப்பெரிய எதிர்பார்ப்பை ஏற்படுத்தியுள்ளது.
இந்நிலையில், இந்திய அணி பல்வேறு பரிசோதனை முயற்சிகளை கேப்டன் கோலி மேற்கொண்டுவருகிறார். இத்தனை நாட்களாக நான்காம் இடத்தில் ஆடிவந்த ராயுடுவை நீக்கிவிட்டு, ராகுல் களமிறங்குகிறார். அதேபோல், அனுபவ வீரர் தோனிக்கு ஓய்வளித்துவிட்டு இளம் வீரர் பந்த் களமிறக்கப்படுகிறார்.
நான்காவது ஒருநாள் போட்டியில், ராகுல் சரியாக ரன்களை எடுக்கத் தவறினார். அதேபோல் பந்த் முக்கிய ஸ்டம்பிங் வாய்ப்புகளை தவறவிட்டார். அதேபோல் கோலியும் கேப்டன்சியில் யுக்தி வகுப்பதில் சிரமப்பட்டார் என்பது ரசிகர்களுக்கு நன்றாக தெரிந்தது.
இதுகுறித்து கேள்வி எழுப்பியுள்ள இந்திய அணியின் முன்னாள் வீரர் பிஷன் சிங் பேடி, 'உலகக்கோப்பையை இன்னும் இரண்டு மாதங்களில் வைத்துக்கொண்டு பல்வேறு பரிசோதனை முயற்சிகளில் ஈடுபட்டுவருவது அதிருப்தி அளிக்கிறது. தோனி இல்லாமல் கோலியால் தனியாக செயல்பட முடியவில்லை.
ரவீந்திர ஜடேஜாவை சரியாக பயன்படுத்த தவறிவருகின்றனர். ரிஷப் பந்த்-க்கு கடிவாளம் தேவை. தொடர்ந்து விக்கெட் கீப்பிங்கில் செய்த தவறுகளையே செய்கிறார்.
நான்காவது ஒருநாள் போட்டியில், 359 ரன்களை இரண்டு ஓவர்கள் மீதமிருக்கும் நிலையில் ஆஸ்திரேலிய அணி வெல்கிறது என்றால் நம் அணிக்கும் இருக்கும் பிரச்னைகளுக்கு விரைவில் தீர்வு காண வேண்டும் என்பது தெளிவாகிறது' எனத் தெரிவித்துள்ளார்.
