#GT20: ஒரே ஓவரில் டோட்டல் மேட்ச் க்ளோஸ்; கெயில் மேஜிக்!

குளோபல் டி20 கிரிக்கெட் போட்டியில் வான்கூவர் நைட்ஸ் அணியின் கேப்டன் கெயில் ஒரே ஓவரில் 32 ரன்களை விளாசி அசத்தியுள்ளார்.

கிரிக்கெட்டில் யுனிவர்சல் பாஸ் என்று அழைக்கப்படுபவர் கிறிஸ் கெயில். க்ரீஸில் நின்றபடியே பந்தை சிக்சருக்கு அனுப்பும் திறன் படைத்தவர். இவர் தனது அசாத்தியமான பேட்டிங் திறமையால் சர்வதேச ஒருநாள், டி20 போட்டிகளில் அதிக சிக்சர் அடித்த வீரர் என்ற சாதனை படைத்துள்ளார்.

தற்போது கனடாவில் குளோபல் டி20 கிரிக்கெட் தொடர் நடைபெற்று வருகிறது. இதில், எட்மண்ட் ராயல் அணிக்கு எதிராக நேற்று நடைபெற்ற போட்டியில் வான்கூவர் நைட்ஸ் அணி ஆறு விக்கெட்டுகள் வித்தியாசத்தில் வெற்றிபெற்றது.இதில், 166 ரன் இலக்குடன் ஆடிய வான்கூவர் அணியின் கேப்டன் கெயில், ஆரம்பத்திலிருந்தே அதிரடியான ஆட்டத்தை வெளிப்படுத்தினார். அந்த அணியின் வெற்றிக்கு எட்டு ஓவர்களில் 59 ரன்கள் தேவைப்பட்ட நிலையில், கெயிலின் அதிரடி ஆட்டம் அடுத்த கியருக்கு சென்றது.

ஆட்டத்தின் 13ஆவது ஓவரை ஷதாப் கான் வீசினார். அவரது பந்துவீச்சை எதிர்கொண்ட கெயில், முதலிரண்டு பந்துகளை மிட் விக்கெட் திசையில் ஃப்ளாட் சிக்சர்களாக பறக்கவிட்டார். பின்னர், மூன்றாவது, நான்காவது பந்தை நேர்த்தியாக பவுண்ட்ரிக்கு அனுப்பினார். இதைத்தொடர்ந்து, ஐந்தாவது, கடைசி பந்தை மீண்டும் ஆக்ஷன் ரிப்ளே போல் சிக்சருக்கு பறக்கவிட்டு ரசிகர்களை குதூகலமாக்கினார்.

இதனால், கெயில் அந்த ஓவரில் 6,6,4,4,6,6 என மொத்தம் 32 ரன்களை விளாசினார். இதன்மூலம், வான்கூவர் அணியின் வெற்றி எளிதில் உறுதியானது. தொடர்ந்து சிறப்பாக ஆடிய கெயில் 44 பந்துகளில் ஆறு பவுண்ட்ரிகள், ஒன்பது சிக்சர்கள் என 94 ரன்களில் ஆட்டமிழந்தார். ஷதாப் கான் வீசிய பந்துகளில் வானவேடிக்கை நிகழ்த்திய கெயிலின் வீடியோ இணையதளத்தில் வைரலாகி வருகிறது.