லக்ஷமண் கனவை நிறைவேற்றிய விராட் கோலி!

விராட் கோலி தலைமையிலான இந்திய கிரிக்கெட் அணி ஆஸ்திரேலியா அணியை அவர்களின் சொந்த மண்ணில் வைத்து டெஸ்ட் தொடரில் வீழ்த்தியதே இந்த வருடத்தில் எனக்குப் பிடித்த தருணம் என முன்னாள் வீரர் விவிஎஸ் லக்ஷமண் தெரிவித்துள்ளார்.

2019ஆம் ஆண்டு முடிவடைய இன்னும் சில நாள்களே உள்ளன. இந்தியர்களுக்கு மிகவும் நெருக்கமான விளையாட்டு கிரிக்கெட் என்பதால், இந்த வருடத்தில் இந்திய கிரிக்கெட்டில் நடந்த தங்களுக்குப் பிடித்த தருணங்கள் குறித்து ரசிகர்களும், முன்னாள் வீரர்களும் சமூக வலைதளங்களில் பதிவிட்டுவருகின்றனர்.

அதில் முன்னாள் இந்திய கிரிக்கெட் வீரர் விவிஎஸ் லக்ஷ்மண் தனக்கு மிகவும் பிடித்த தருணங்களைப் பற்றி பகிர்ந்துள்ளார். அதில், "இந்திய கிரிக்கெட் அணிக்கு இந்த வருடம் டெஸ்ட் கிரிக்கெட்டில் மிகச்சிறந்த வருடமாக அமைந்தது. ஆஸ்திரேலியா அணியை அவர்களின் சொந்த மண்ணில் வைத்து வீழ்த்துவது எனது கனவாக இருந்தது. அதனை இந்த ஆண்டின் தொடக்கத்தில் விராட் கோலி தலைமையிலான இந்திய கிரிக்கெட் அணி சாதித்தது. அதுதான் இந்த ஆண்டில் மிகவும் பிடித்தமான தருணம்" எனக் குறிப்பிட்டுள்ளார்.

அதேபோல் முன்னாள் வேகப்பந்துவீச்சாளர் இர்ஃபான் பதான் பேசுகையில், இந்த வருடத்தில் இந்திய அணியின் வேகப்பந்துவீச்சாளர்கள் மிக அழகாகப் பந்துவீசினார்கள். இதுவரை இந்திய அணி வேகப்பந்துவீச்சாளர் கூட்டணிகளிலேயே இந்த ஆண்டில்தான் மிகச்சிறந்த வேகப்பந்துவீச்சு கூட்டணி அமைந்துள்ளது.

முன்னாள் வீரர் விவிஎஸ் லக்ஷ்மண்

இந்த வருடத்தில் இந்திய அணி பந்துவீச்சாளர்கள் மிக நுட்பமாகவும் சாதூர்யமாகவும் பந்துவீசினார்கள். புதிய பந்தாக இருந்தாலும், பழைய பந்தாக இருந்தாலும் ஸ்விங் செய்தார்கள். கடினமான பிட்ச்களில் சிறப்பாகச் செயல்பட்டுள்ளார்கள். அதைத்தான் இந்த ஆண்டில் இந்திய அணியின் மிக முக்கிய வளர்ச்சியாகப் பார்க்கிறேன் எனக் கூறியுள்ளார்.

இதையும் படிங்க: இஷாந்த் சர்மா வேகத்தில் 69 ரன்களுக்கு சுருண்ட ஹைதராபாத்!