தொடரை வென்ற இந்திய அணிக்கு குவியும் பாராட்டு!

ஆஸ்திரேலியாவுக்கு எதிரான நான்காவது டெஸ்ட் போட்டியில் வெற்றி பெற்று, பார்டர் - கவாஸ்கர் டெஸ்ட் தொடரை 2-1 என்ற கணக்கில் கைப்பற்றியுள்ள இந்திய அணிக்கு பல்வேறு பிரபலங்களும் தங்களது பாராட்டுகளை தெரிவித்து வருகின்றனர்.

ஆஸ்திரேலியாவுக்கு எதிராக பிரிஸ்பேனில் நடைபெற்ற நான்காவது டெஸ்ட் போட்டியில் இந்திய அணி 3 விக்கெட் வித்தியாசத்தில் வெற்றி பெற்று அசத்தியது. இந்த வெற்றியின் மூலம் நான்கு போட்டிகள் கொண்ட பார்டர் - கவாஸ்கர் டெஸ்ட் தொடரை 2-1 என்ற கணக்கில் கைப்பற்றி இந்திய அணி வரலாற்று சாதனையையும் நிகழ்த்தியது.

ஆஸி மண்ணில் ஆஸ்திரேலிய அணியை வீழ்த்தி டெஸ்ட் தொடரைக் கைப்பற்றிய இந்திய அணிக்கு பல்வேறு தரப்பிலிருந்து பாராட்டுகள் குவிந்து வருகிறது. அதன்படி,

இந்திய பிரதமர் நரேந்திர மோடி தனது ட்விட்டர் பதிவில், ”ஆஸ்திரேலிய மண்ணில் இந்திய கிரிக்கெட் அணியின் வெற்றியைக் கண்டு நாங்கள் அனைவரும் மகிழ்ச்சியடைகிறோம். அவர்களின் குறிப்பிடத்தக்க ஆற்றலும், ஆர்வமும் இப்போட்டியில் முழுவதும் தெரிந்தது. இந்திய அணிக்கு வாழ்த்துகள்! உங்கள் எதிர்கால முயற்சிகளுக்கும் வாழ்த்துகள்” என்று பதிவிட்டுள்ளார்.

பிசிசிஐ தலைவர் சௌரவ் கங்குலி தனது பதிவில், ”வரலாற்றில் குறிப்பிடத்தக்க வெற்றி. அதுவும் ஆஸ்திரேலிய மண்ணில் கிடைத்துள்ளது. இந்த வெற்றியானது இந்திய கிரிக்கெட் வரலாற்றில் என்றென்றும் நினைவுகூரப்படும். இத்தொடரைக் கைப்பற்றிய இந்திய அணிக்கு ஐந்து கோடியை பிசிசிஐ வழங்கியுள்ளது. இந்த வெற்றிக்காக உழைத்த அனைவருக்கும் வாழ்த்துகள்” என்று பதிவிட்டுள்ளார்.

பிசிசிஐ செயலாளர் ஜெய் ஷா தனது ட்விட்டர் பக்கத்தில், ”இந்திய கிரிக்கெட் அணியின் சிறப்பு தருணங்கள் இவை. அதனால் ஆஸ்திரேலிய அணிக்கெதிராக டெஸ்ட் தொடரைக் கைப்பற்றிய இந்திய அணிக்கு ரூ.5 கோடி பிசிசிஐ சார்பில் வழங்கப்படும்” என்று பதிவிட்டுள்ளார்.

இந்திய அணியின் முன்னாள் ஜாம்பவான் சச்சின் டெண்டுல்கர் தனது பதிவில், ”இந்த டெஸ்ட் போட்டியின் ஒவ்வொரு செஷனிலும் நாங்கள் ஒரு புதிய ஹீரோவைக் கண்டுபிடித்தோம். ஒவ்வொரு முறையும் நாங்கள் தடுமாறியபோதும், அச்சமற்ற நம்பிக்கையை நாங்கள் கொண்டிருந்தோம். இத்தொடரின்போது பலர் காயங்கள் காரணமாக விலகியபோதும் இந்திய அணி நம்பிக்கையுடன் இத்தொடரை எதிர்கொண்டது. மிகப்பெரிய தொடர்களில் பெற்ற வெற்றிகளில் இதுவும் ஒன்று. வாழ்த்துக்கள் இந்தியா” என்று பதிவிட்டுள்ளார்.

கூகுள் நிறுவனத்தின் தலைமை செயல் அலுவலர் சுந்தர் பிச்சை, ”வரலாற்றில் பதிக்கப்பட்ட மிகப்பெரிய கிரிக்கெட் தொடர்களில் இதுவும் ஒன்று. ஆஸ்திரேலிய அணிக்கெதிராக சிறப்பான ஆட்டத்தை வெளிப்படுத்திய இந்திய அணிக்கு வாழ்த்துகள்” என்று பதிவிட்டுள்ளார்.

இந்திய அணியின் கேப்டன் விராட் கோலி, ”என்ன ஒரு வெற்றி !!! அடிலெய்டுக்குப் பிறகு எங்களை சந்தேகித்த அனைவரும், தற்போது எழுந்து நின்று எங்களை கவனியுங்கள். இந்திய அணியின் முன்மாதிரியான செயல்திறன், மன உறுதியை இத்தொடர் வெளிப்படுத்தியுள்ளது. இந்த வெற்றிக்காக உழைத்த அனைத்து வீரர்களுக்கும், அணி நிர்வாகத்திற்கும் வாழ்த்துகள். இந்த வரலாற்று வெற்றியை கொண்டாடுங்கள்” என்று பதிவிட்டுள்ளார்.

மேலும் இந்திய அணியின் முன்னாள் வீரர்கள் அனில் கும்ப்ளே, விவிஎஸ் லக்ஷ்மன், விரேந்திர சேவாக், சுரேஷ் ரெய்னா மற்றும் பலரும் தங்களது வாழ்த்துகளைத் தெரிவித்துள்ளனர்.

இதையும்: தாய்லாந்து ஓபன்: இரண்டாவது சுற்றுக்கு முன்னேறிய சிந்து, ஸ்ரீகாந்த்!