வங்கதேச தேர்வுக்குழுத் தலைவர் ஹபிபுல் பஷருக்கு கரோனா உறுதி!

வங்கதேச கிரிக்கெட் வாரியத்தின் புதிய தேர்வுக்குழுத் தலைவரான ஹபிபுல் பஷர் கரோனா வைரசால் பாதிக்கப்பட்டுள்ளது உறுதியாகியுள்ளது.

உலகம் முழுவதும் கரோனா வைரஸ் பாதிப்பு நாளுக்கு நாள் அதிகரித்துவருகிறது. பல்வேறு பிரபலங்களும் கரோனாவால் பாதிக்கப்பட்ட நிலையில், வங்கதேச கிரிக்கெட் டெஸ்ட் கேப்டன் மோமினுல் ஹாக், ஆல் ரவுண்டர் மஹமுதுல்லா ஆகியோர் கரோனாவால் பாதிக்கப்பட்டனர்.

இந்நிலையில் வங்கதேச கிரிக்கெட் வாரியத்தின் புதிய தேர்வுக்குழுத் தலைவரான ஹபிபுல் பஷர் கரோனா வைரசால் பாதிக்கப்பட்டுள்ளது உறுதியாகியுள்ளது. இதைப்பற்றி அவர் வெளியிட்டுள்ள பதிவில், ''நான் மிகவும் பாதுகாப்பாகவே இருந்தேன். இருந்தும் கரோனாவால் பாதிக்கப்பட்டுள்ளேன். இதற்கு நம்மால் எதுவும் செய்ய முடியாது. கடந்த திங்கள்கிழமை கொஞ்சம் காய்ச்சலை உணர்ந்தேன்.

பரிசோதனை செய்தபோது 102 டிகிரியாக இருந்தது. அடுத்த நாளும் இந்தக் காய்ச்சல் குறையவில்லை. பின்னர் கரோனா பரிசோதனை மேற்கொண்டேன். இன்று மாலைதான் முடிவுகள் வந்தன. இப்போது என்னை நானே தனிமைப்படுத்திக் கொண்டுள்ளேன்'' என்றார்.

48 வயதாகும் ஹபிபுல் பஷர் வங்கதேசத்திற்காக 50 டெஸ்ட் போட்டிகள், 111 ஒருநாள் போட்டிகளில் ஆடியுள்ளார். மேலும் ஏற்கனவே கரோனாவால் பாதிக்கப்பட்டிருந்த மற்ற வங்கதேச வீரர்கள் மோர்டசா, அபு ஜெயத், சைஃப் ஹசன் ஆகியோர் மீண்டுள்ளனர்.

இதையும் படிங்க:உலகக்கோப்பை 2021: இது இந்தியாவிற்கான நேரம்…