'நீ விதைத்த வினையெல்லாம்'... ஆஷஸ் மூலம் இங்கிலாந்துக்கு புது மொழி!

உலகக்கோப்பையில் பயன்படுத்தப்பட்ட பவுண்டரி விதிமுறையை ஆஷஸ் டெஸ்ட் தொடரில் பயன்படுத்திருந்தால், ஆஸ்திரேலிய அணிதான் சாம்பியன். இங்கிலாந்து அணி உலகக்கோப்பை தொடரின் இறுதிப் போட்டியில் வெற்றிபெறாமல் உலகக்கோப்பையை வென்றது,  ஆஷஸ் டெஸ்ட் தொடரில் தோல்வி அடையாமல் தொடரை இழந்துவிட்டது.

கடந்த மூன்றரை மாதங்களாக இங்கிலாந்தில் நடைபெற்ற கிரிக்கெட் தொடர்களால் ரசிகர்களுக்கு ஏற்பட்ட ஃபீவர் குறைந்தபாடு இல்லை. முதலில் நடைபெற்ற உலகக்கோப்பை ஒருநாள் கிரிக்கெட் தொடரின் இறுதிப் போட்டி டை, அதன்பின் நடந்த கிளாசிக் டெஸ்ட் தொடராக கருதப்படும் ஆஷஸ் தொடரும் சமன். மாடர்ன் டே கிரிக்கெட்டில் இப்படி ஒரு போட்டியா, ’ரியல் கிரிக்கெட் இஸ் பேக்’ என பலரும் க்ரேஸூடன் ஆஷஸ் டெஸ்ட் தொடர் முடிந்த பின் சமூக வலைதளங்களில் கருத்து தெரிவித்துவருகின்றனர்.

இங்கிலாந்தைச் சேர்ந்த ஸ்டாண்ட் அப் காமெடியனும், எழுத்தாளருமான அன்டி சாஸ்ட்ஸ்மேன் தனது ட்விட்டர் பதிவில், ’இங்கிலாந்து அணி உலகக்கோப்பைத் தொடரின் இறுதிப் போட்டியில் வெற்றிபெறாமல் உலகக்கோப்பையை வென்றது, ஆஷஸ் டெஸ்ட் தொடரில் தோல்வி அடையாமல் தொடரை இழந்துவிட்டது’ என பதிவிட்டுள்ளார்.

உலகக்கோப்பையில் இங்கிலாந்து - நியூசிலாந்து

இங்கிலாந்து அணியை பொறுத்தவரையில், ’உலகக்கோப்பை என்பது இங்கு பலருக்கும் பெயருக்கு பின்னால் போடப்படும் டிகிரி பட்டம் போலதான்’. ஏனெனில், கிரிக்கெட் போட்டியைக் கண்டுபிடித்த நாடான இங்கிலாந்துக்கு இதுவரை அது கவுரவ பிரச்னையாக இருந்துவந்தது. 1975 முதல் 2015ஆம் ஆண்டுவரை நடைபெற்ற 11 உலக்கோப்பை தொடர்களில் இங்கிலாந்து அணி மூன்றுமுறை 1979, 1987, 1992 இறுதிச் சுற்றுவரை சென்று, தனக்கான டிகிரி பட்டத்தை வாங்கத் தவறியது.

இதனால், எப்படியாவது தங்களது அணியின் பெயருக்குப் பின்னால் உலகக்கோப்பை சாம்பியன் என்று வரவேண்டும் என்பதில் அந்நாட்டு கிரிக்கெட் வீரர்களும், ரசிகர்களும் தீர்க்கமாக இருந்தனர். இந்த சூழலில் 2019உலகக்கோப்பை இங்கிலாந்தில் நடைபெற்றது. இந்த இடைவேளையில் இங்கிலாந்து அணி இதற்காக தயாரானது. அதுமட்டுமில்லாமல், அவர்கள் மீது படையெடுத்து வந்த அணிகளையெல்லாமல் வீழ்த்தி வின்னிங் ஃபார்மில் இருந்தது. இதனால், சொந்த மண்ணில் நீண்ட நாள் ஆசை நிறைவேறும் என பலரும் நினைத்தனர்.

நினைத்ததைப் போலவே, உலகக் கோப்பைத் தொடரின் இறுதிப் போட்டிக்குள் இங்கிலாந்து அணி நான்காவது முறையாக நுழைந்தது. கிரிக்கெட்டின் மெக்காவான லார்ட்ஸில் இங்கிலாந்து - நியூசிலாந்துக்கு இடையேயான இறுதிப் போட்டி நடைபெற்றது. ஒரு ஓவர் த்ரோவால் அந்த போட்டி சமனில் முடிந்தது. அதன்பின், கிரிக்கெட்டின் மினி வெர்ஷனான சூப்பர் ஓவரிலும் போட்டி டை ஆனது.

உலகக்கோப்பை வென்ற மகிழ்ச்சியில் இங்கிலாந்து

இரு அணிகளும் வெற்றி தோல்வி இரண்டுமே பெறவில்லை. ஆனால், இந்த இடத்தில் ஐசிசி பவுண்டரி விதிமுறையை கணக்கிட்டது. அதன் அடிப்படையில் 26-17 என்ற கணக்கில் இங்கிலாந்து அணிதான் சாம்பியன் என அறிவித்தது. 45 ஆண்டுகாலமாக வாங்க முடியாத அந்த கோப்பையையை (டிகிரியை) ஐசிசி விதிமுறைப்படி இங்கிலாந்து அணி பெற்றது.

ஜோ ரூட்

அந்தப் போட்டி முடிந்தப் பின், ”எங்களுக்கு உலகக்கோப்பையைவிட ஆஷஸ்தான் மிகவும் முக்கியமானது. இம்முறை அந்தத் சாம்பலை நாங்கள் மீட்டெடுப்போம்” என இங்கிலாந்து அணியின் டெஸ்ட் கேப்டன் ஜோ ரூட் சூளுரைத்தார். ஏனெனில், அளவில் பெரியதாக இருக்கும் உலகக் கோப்பை அவர்களுக்கு மனதளவில் சிறிய கோப்பைதான். ஆனால் அளவில் சிறியதாக இருக்கும் அந்த சாம்பல் நிறைந்த ஆஷஸ் கோப்பைதான் அவர்களது மனநிலையைப் பொறுத்தவரை உலகக் கோப்பை.

ஐந்து போட்டிகள் கொண்ட இந்தத் தொடரில் ஒவ்வொரு போட்டியும் த்ரிலிங்காகதான் இருந்தது. குறிப்பாக, லீட்ஸில் நடைபெற்ற மூன்றாவது போட்டி ஒட்டுமொத்த ரசிகர்களையும் சீட்டின் நுனியில் அமரவைத்தது. எட்ஜ்பாஸ்டன், லார்ட்ஸ், லீட்ஸ், மான்செஸ்டர் ஆகிய இடங்களில் நடந்த நான்கு போட்டிகள் முடிந்தபோது இங்கிலாந்து அணி 1-2 என்ற கணக்கில் பின் தங்கி இருந்தது.

லீட்ஸில் மேஜிக் செய்த பென் ஸ்டோக்ஸ்

சொந்தநாட்டில் சாம்பல் தொடரை சமன் செய்யுமா அல்லது 18 ஆண்டுகளுக்குப் பிறகு மீண்டும் தங்களது சாம்பலை ஆஸ்திரேலியாவிடம் தாரைவார்க்குமா என பதற்றம் கலந்த எதிர்பார்ப்பு இங்கிலாந்து ரசிகர்களுக்கு தோன்றியது.

ஒருவழியாக, ஓவல் மைதானத்தில் நடைபெற்ற கடைசிப் போட்டியில் இங்கிலாந்து அணி வெற்றிவாகை சூடியது. இதனால், 47 ஆண்டுகளுக்குப் பிறகு ஆஷஸ் டெஸ்ட் தொடர் 2-2 என்ற கணக்கில் டிராவானது.ஆனால், கடந்த ஆஷஸ் தொடரில் இங்கிலாந்து அணி 4-0 என்ற கணக்கில் தோல்வி அடைந்ததால், அந்த சாம்பலை ஆஸ்திரேலியா தக்க வைத்துக்கொண்டது.

சாம்பலை (ஆஷஸ்) தக்க வைத்துக்கொண்ட ஆஸி.

ஒருவேளை ஐசிசி உலகக்கோப்பைப் போல இந்த ஆஷஸ் டெஸ்ட் தொடரில் வெற்றியாளர் யார் என்பதை தீர்மானிக்க, பவுண்டரி கணக்கு விதிமுறையை பயன்படுத்திருந்தால் கோப்பை யாருக்கு சென்றிருக்கும் என கேள்வி எழுந்துள்ளது. அப்படி பவுண்ட்ரி விதிமுறைப்படி பார்த்திருந்தால் 346- 305 என்ற கணக்கில் ஆஸ்திரேலிய அணிதான் இந்த ஆஷஸ் தொடரின் வெற்றியாளர் என ஐசிசி அறிவிருத்திருக்கும். ஆனால் ஐசிசி அப்படி அறிவிக்கவில்லை.

ஆஷஸ் டெஸ்ட்

ஒட்டுமொத்ததில், அன்டி சாஸ்ல்டன் ட்வீட் செய்ததை போல இங்கிலாந்து அணி வெற்றி பெறாமல் உலகக்கோப்பையை வென்றது, தொடரை டிரா செய்தும் ஆஷஸ் கோப்பையை இழந்துள்ளது. ஆகமொத்தம், “ நீ விதைத்த வினையெல்லாம் உன்னை அறுக்கக் காத்திருக்கும்” என்ற பழமொழி இங்கிலாந்துக்கு தற்போது பொருந்தி போயிருக்கிறது...