AUS vs IND : அகர் அவுட் ; லயன் இன் - சந்தேகத்தில் ஃபின்ச்?

இந்தியா - ஆஸ்திரேலியா அணிக்கெதிரான டி20 தொடரின்போது காயமடைந்த ஆஸ்திரேலிய சுழற்பந்து வீச்சாளர் ஆஷ்டன் அகருக்கு பதிலாக, நாதன் லயன் அணியின் சேர்க்கப்பட்டுள்ளார்.

ஆஸ்திரேலியா - இந்தியா அணிகளுக்கு இடையேயான மூன்று போட்டிகள் கொண்ட டி20 தொடர் நடைபெற்று வருகிறது. இதில் நேற்று (டிச.04) நடைபெற்ற முதலாவது டி20 போட்டியில், இந்திய அணி 11 ரன்கள் வித்தியாசத்தில் ஆஸ்திரேலிய அணியை வீழ்த்தி வெற்றிப் பெற்றது.

இந்நிலையில் ஆஸ்திரேலிய டி20 அணியின் இடம்பிடித்திருந்த இடக்கை சுழற்பந்து வீச்சாளர் ஆஷ்டன் அகர், காயம் காரணமாக மீதமுள்ள டி20 போட்டிகளிலிருந்து விலகியுள்ளார். மேலும் அவருக்கு மாற்று வீரராக டெஸ்ட் அணியில் இடம்பிடித்திருந்த நாதன் லயன் சேர்க்கப்பட்டுள்ளதாக ஆஸ்திரேலிய கிரிக்கெட் வாரியம் அறிவித்துள்ளது.

அதேசமயம் இந்திய அணிக்கெதிரான முதலாவது டி20 போட்டியின்போது காயமடைந்த ஆஸி அணியின் கேப்டன் ஆரோன் ஃபின்ச்சின் மருத்துவ அறிக்கையைப் பொறுத்து, அவர் நாளைய போட்டியில் பங்கேற்பாரா அல்லது தொடரிலிருந்து விலகுவாரா என்பது அறிவிக்கபடும் என்று ஆஸ்திரேலிய கிரிக்கெட் வாரியம் தெரிவித்துள்ளது.

இந்தியா - ஆஸ்திரேலியா அணிகளுக்கு இடையேயான இரண்டாவது டி20 போட்டி, சிட்னி கிரிக்கெட் மைதானத்தில் நாளை (டிச.06) மதியம் 1.40 மணிக்குத் தொடங்கவுள்ளது.

இதையும் படிங்க:ஆப்கானிஸ்தான் முன்னணி சுழற்பந்து வீச்சாளருக்கு கரோனா!