தாய்லாந்து ஓபன் பேட்மிண்டன்: முதல் சுற்றில் சாய்னா தோல்வி; வெர்மா வெற்றி!

தாய்லாந்து ஓபன் பேட்மிண்டன் தொடரின் மகளிர் ஒற்றையர் பிரிவு ஆட்டத்தில் இந்தியாவின் சாய்னா நேவால் தாய்லாந்தின் ராட்சனோக் இன்டனாவிடம் அதிர்ச்சி தோல்வியடைந்து தொடரிலிருந்து வெளியேறினார்.

தாய்லாந்து ஓபன் பேட்மிண்டன் தொடர் பாங்காக்கில் நேற்று (ஜன.19) தொடங்கியது. இதில் மகளிர் முதல் சுற்று ஆட்டத்தில் இந்தியாவின் சாய்னா நேவால் - தாய்லாந்தின் ராட்சனோக் இன்டனானை (Ratchanok Intanon) எதிர்கொண்டார்.

பரபரப்புடன் தொடங்கிய இப்போட்டியில் சிறப்பான ஆட்டத்தை வெளிப்படுத்திய ராட்சனோக் இன்டனான் 21-17, 21-08 என்ற நேர் செட் கணக்கில் இந்தியாவின் சாய்னா நேவாலை வீழ்த்தினார். இதன் மூலம் சாய்னா நேவால் முதல் சுற்றோடு தொடரிலிருந்து வெளியேறி அதிர்ச்சியளித்தார்.

நேற்று நடைபெற்ற ஆடவர் ஒற்றையர் பிரிவில் நடைபெற்ற முதல் சுற்று போட்டியில் இந்தியாவின் சமீர் வெர்மா - மலேசியாவின் லீ ஸி ஜியாவை எதிர்கொண்டார். இப்போட்டியின் முதல் செட்டை லீ ஸி ஜியா 21 18 என்ற கணக்கில் கைப்பற்றினார்.

இதையடுத்து, தனது அபார ஆட்டத்தை வெளிப்படுத்தி சமீர் வெர்மா இரண்டாவது செட்டை 27-25 என்ற கணக்கில் போராடி கைப்பற்றினார். இதனால் இப்போட்டியில் யார் வெற்றி பெறுவார் என்ற பரபரப்பு ஏற்பட்டது.

தொடர்ந்து நடைபெற்ற மூன்றாம் செட் ஆட்டத்திலும் தனது அபார ஆட்டத்தை வெளிப்படுத்திய சமீர் வெர்மா 21-19 என்ற கணக்கில் கைப்பற்றினார். இதன் மூலம் இந்தியாவின் சமீர் வெர்மா 18-21, 27-25, 21-19 என்ற செட் கணக்கில் மலேசியாவின் லி ஸி ஜியாவை வீழ்த்தி இரண்டாவது சுற்றுக்கு முன்னேறினார்.

இதையும் படிங்க:தாய்லாந்து ஓபன்: இரண்டாவது சுற்றுக்கு முன்னேறிய சிந்து, ஸ்ரீகாந்த்!