சீன ஓபன்: பி.வி. சிந்துவை தொடர்ந்து முதல் சுற்றிலேயே நடையைக் கட்டிய சாய்னா!

சீன ஓபன் பேட்மிண்டன் தொடரில் இந்திய நட்சத்திர வீராங்கனை சாய்னா நேவால் முதல் சுற்றிலேயே வெளியேறியுள்ளார்.

இந்த ஆண்டுக்கான சீன ஓபன் பேட்மிண்டன் தொடர் அந்நாட்டின் ஃபுஷோ நகரில் நடைபெற்றுவருகிறது. இதில், நேற்று நடைபெற்ற மகளிர் ஒற்றையர் பிரிவு முதல் சுற்றிலேயே உலக சாம்பியனும் இந்திய நட்சத்திர வீராங்கனையுமான பி.வி. சிந்து அதிர்ச்சித் தோல்வியடைந்தார்.

இந்நிலையில், இன்று நடைபெற்ற மகளிர் ஒற்றையர் பிரிவு மற்றொரு முதல் சுற்றுப் போட்டியில் ஒன்பதாம் நிலை வீராங்கனை இந்தியாவின் சாய்னா நேவால், சீனாவைச் சேர்ந்த 22ஆம் நிலை வீராங்கனை கய் யான்யான்-உடன் பலப்பரீட்சை நடத்தினார்.

பரபரப்பாக நடைபெற்ற இப்போட்டியில் சாய்னா நேவால், 9-21, 12-21 என்ற நேர் செட் கணக்கில் தோல்வியடைந்து தொடரிலிருந்து வெளியேறினார். பி.வி. சிந்துவைத் தொடர்ந்து தற்போது சாய்னா நேவாலும் இந்தத் தொடரில் நடையைக் கட்டியதால் இந்திய பேட்மிண்டன் ரசிகர்கள் சோகத்தில் உள்ளனர்.

சமீபகாலமாக சாய்னா நேவால் தனது சிறப்பான ஆட்டத்தை வெளிப்படுத்த முடியாமல் தடுமாறிவருகிறார். இறுதியாக அவர், பிரெஞ்சு ஓபன் பேட்மிண்டன் தொடரில் காலிறுதிவரை முன்னேறினார் என்பது குறிப்பிடத்தக்கது.