சுவிஸ் ஓபன்: அரையிறுதிச் சுற்றில் இந்திய இணை!

சுவிஸ் ஓபன் பேட்மிண்டன் தொடரின் ஆடவர் இரட்டையர் பிரிவு அரையிறுதிச்சுற்றுக்கு இந்தியாவின் சத்விக்சாய்ராஜ் ரங்கிரெட்டி, சிராக் ஷெட்டி இணை முன்னேறியது.

சுவிஸ் ஓபன் பேட்மிண்டன் தொடர் சுவிட்சர்லாந்தில் நடைபெற்றுவருகிறது. நேற்று (மார்ச் 5) நடைபெற்ற ஆடவர் இரட்டையர் பிரிவு காலிறுதிச்சுற்றில் இந்தியாவின் சத்விக்சாய்ராஜ் ரங்கிரெட்டி, சிராக் ஷெட்டி இணை - மலேசியாவின் ஆங் யூ சின், தியோ ஈ யி இணையுடன் பலப்பரீட்சை நடத்தியது.

இப்போட்டியின் முதல் செட்டை ஆங் யூ சின் இணை 21- 12 என்ற கணக்கில் கைப்பற்றியது. அதன்பின் சிறப்பான ஆட்டத்தை வெளிப்படுத்திய ரங்கிரெட்டி இணை 21-19 என்ற கணக்கில் இரண்டாவது செட்டை கைப்பற்றி ஆட்டத்தில் சமநிலையை ஏற்படுத்தியது.

இதையடுத்து நடைபெற்ற மூன்றாவது செட் ஆட்டத்தில் அபாரமாக விளையாடிய ரங்கிரெட்டி இணை 21-12 என்ற கணக்கில் செட்டைக் கைப்பற்றி ஆங் யூ சின் இணைக்கு அதிர்ச்சியளித்தது.

இதன்மூலம் இந்திய இணை 12-21, 21-19, 21-12 என்ற செட் கணக்கில் மலேசிய இணையை வீழ்த்தி, சுவிஸ் ஓபன் பேட்மிண்டன் தொடரின் அரையிறுதிச்சுற்றுக்கு முன்னேறியது.

இதையும் படிங்க: டி20: ஃபின்ச் அதிரடியில் தொடரை சமன் செய்தது ஆஸ்திரேலியா!