ஜப்பான் ஓபன் பேட்மிண்டன்: காலிறுதியில் வெளியேறிய பி வி சிந்து!

டோக்கியோ: ஜப்பான் ஓபன் பேட்மிண்டன் தொடரில் இந்திய நட்சத்திர வீராங்கனை பி.வி. சிந்து காலிறுதியில் அகானே யமகுச்சியிடம் தோல்வியடைந்து வெளியேறினார்.

ஜப்பான் ஓபன் பேட்மிண்டன் தொடர் ஜப்பான் தலைநகர் டோக்கியோவில் நடைபெற்று வருகிறது, இதன் காலிறுதிச் சுற்றுப் போட்டியில் இந்திய நட்சத்திர வீராங்கனை பி.வி. சிந்துவை எதிர்த்து ஜப்பான் வீராங்கனை யமகுச்சி விளையாடினார்.

இதில் போட்டியின் தொடக்கத்திலிருந்தே சிறப்பாக ஆடிய யமகுச்சி புள்ளிக் கணக்கில் தொடர்ந்து முன்னணியில் இருந்தார். முதல் செட்டை 21-18 என யமகுச்சி கைப்பற்ற, தொடர்ந்து நடைபெற்ற இரண்டாவது செட் ஆட்டத்தில் யமகுச்சி ஆக்ரோஷமான ஆட்டத்தை வெளிப்படுத்தினார்.

இதையடுத்து இரண்டாவது செட்டையும் 21-15 என்ற செட் கணக்கில் யமகுச்சி கைப்பற்றினார். இந்த தோல்வியின் மூலம் சிந்து ஜப்பான் ஓபன் பேட்மிண்டன் தொடரிலிருந்து வெளியேறினார்.