2019ஆம் ஆண்டுக்கான மலேசிய ஓபன் பேட்மிண்டன் தொடர் மலேசியா தலைநகர்கோலாலம்பூரில் நடைபெற்றுவருகிறது. இதில், நேற்று நடைபெற்ற மகளிர் ஒற்றையர் பிரிவு முதல் சுற்றில் இந்திய வீராங்கனை சாய்னா நேவால், தாய்லாந்தின் போர்பவீ சோச்சுவாங்கை எதிர்கொண்டார்.
பரபரப்பாக நடைபெற்ற இப்போட்டியில் சாய்னா 22-20, 15-21, 10-21 என்ற செட் கணக்கில் போர்பவீ சோச்சுவாங்கிடம் தோல்வி அடைந்து தொடரிலிருந்து வெளியேறினார்.
இதேபோல் நடைபெற்ற மற்றொருமகளிர்ஒற்றையர் பிரிவு முதல் சுற்றில், இந்திய நட்சத்திர வீராங்கனை பி.வி.சிந்து 22-20, 21-12 என்ற நேர் செட் கணக்கில் ஜப்பானின் அயா ஓஹோரியை வீழ்த்தினார். இதைத்தொடர்ந்து, இன்று நடைபெறவுள்ள இரண்டாம் சுற்றில் பி.வி.சிந்து, தென்கொரியாவை சேர்ந்த சங் ஜி ஹியுனை எதிர்கொள்கிறார்.
இதேபோல்ஆடவர் ஒற்றையர் பிரிவு முதல் சுற்றில், இந்திய வீரர் கிதாம்பி ஸ்ரீகாந்த் 21-18, 21-16 என்ற நேர் செட் கணக்கில் மவ்லானா முஸ்தஃபாவை வீழ்த்தி இரண்டாம் சுற்றுக்கு முன்னேறினார்.
இன்று நடைபெறவுள்ள ஆடவருக்கான ஒற்றையர் பிரிவு இரண்டாம் சுற்றில், அவர் தாய்லாந்தின் கோசித் பெட்பிரதாபை சந்திக்கவுள்ளார்.