#BWFChampionships2019: 36 ஆண்டுகளுக்குப் பின் பதக்கத்தை உறுதிப்படுத்திய இந்தியர்!

பசெல்: ஆடவர் காலிறுதிச்சுற்றில் இந்தியாவின் சாய் பிரனீத் இந்தோனேசியாவின் ஜொனதன் கிறிஸ்டியை (Jonathan Christie) வீழ்த்தி அரையிறுதிச் சுற்றுக்கு முன்னேறியுள்ளார்.

உலக பேட்மிண்டன் கூட்டமைப்பு சார்பில் 2019ஆம் ஆண்டுக்கான உலக பேட்மிண்டன் சாம்பியன்ஷிப் தொடர் சுவிட்சர்லாந்தின் பசெல் நகரில் நடைபெற்றுவருகிறது. இதில், ஆடவர் ஒற்றையர் பிரிவு காலிறுதிச்சுற்றில் இந்திய நட்சத்திர வீரர் சாய் பிரனீத், ஆசிய சாம்பியனான இந்தோனேசியாவின் ஜொனதன் கிறிஸ்டியை எதிர்கொண்டார்.

விறுவிறுப்பான இந்த ஆட்டத்தில் சாய் பிரனீத் 24-22, 21-14 என்ற செட் கணக்கில் ஜொனதன் கிறிஸ்டியை வீழ்த்தி முதல் முறையாக உலக பேட்மிண்டன் சாம்பியன்ஷிப் தொடரின் அரையிறுதி போட்டிக்கு தகுதி பெற்றுள்ளார்.

கடந்த 1983ஆம் ஆண்டு சம்பியன்ஷிப் போட்டியின் ஆடவர் ஒற்றையர் பிரிவில் இந்தியாவின் பிரகாஷ் படுகோனே வெண்கலம் வென்றதே இதுவரை சாம்பியன்ஷிப் ஆடவர் பிரிவு பேட்மிண்டனில் இந்தியாவிற்கு கிடைத்த ஒரே பதக்கம்.

வெற்றி பெற்ற மகிழ்ச்சியில் சாய் பிரனீத்

தற்போது 36 ஆண்டுகளுக்கு பிறகு ஆடவர் ஒற்றையர் பிரிவில் இந்தியாவின் சாய் பிரனீத் உலக பேட்மிண்டன் சாம்பியன்ஷிப் தொடரின் அரையிறுதி போட்டிக்கு தகுதி பெற்று பதக்கத்தை உறுதிசெய்துள்ளார்.