'விலங்கு எனக்கு ரீஎன்ட்ரி படம்' - நடிகர் விமல்

விலங்கு தனக்கு ரீஎன்ட்ரி படம் என நடிகர் விமல் தெரிவித்துள்ளார்.

பிரசாந்த் இயக்கத்தில் விமல் நடித்துள்ள விலங்கு வெப் சீரிஸின் செய்தியாளர் சந்திப்பு சென்னையில் நடைபெற்றது.

ஜீ5 ஓடிடி தளத்தில் வரும் 18ம் தேதி வெளியாகவுள்ள விலங்கு வெப் சீரிஸில் விமல், இனியா, பால சரவணன், முனீஸ்காந்த் உள்ளிட்டோர் நடித்துள்ளனர்.

இந்த சீரிஸின் நாயகனான விமல் பேசுகையில்,”விலங்கு ஒரு உண்மைச் சம்பவம் இதனை முதலில் திரைப்படமாக எடுக்க நினைத்தோம். ஆனால் வெப் சீரிஸாக எடுத்துவிட்டோம். தோல்வியில் தான் அனுபவம் கிடைக்கும். இது எனக்கு ஒரு ரீஎன்ட்ரி படம். இனிவரும் காலங்களில் இதுபோன்ற நல்ல கதைகளை தேர்ந்தெடுத்து நடிப்பேன்”என தெரிவித்தார்.

இதனையடுத்து பேசிய நாயகி இனியா,”இது எனக்கு முதல் வெப் சீரிஸ். வாகை சூட வா படத்திற்கு பிறகு விமலுடன் இணைந்து நடித்துள்ளேன். அப்போது பார்த்த விமலுக்கும் தற்போது உள்ள விமலுக்கும் நிறைய மாற்றங்கள் உள்ளன. எனக்கு இதில் நல்ல கதாபாத்திரம் கிடைத்துள்ளது நன்றி” என தெரிவித்தார்.