விஜய் சேதுபதியின் 'துக்ளக் தர்பார்' ஃபர்ஸ்ட் லுக் வெளியீடு!

விஜய் சேதுபதி நடிப்பில் உருவாகிவரும்' துக்ளக் தர்பார்' படத்தின் ஃபர்ஸ்ட் லுக் போஸ்டரை படக்குழு தற்போது வெளியிட்டுள்ளது.

மக்கள் செல்வன் விஜய் சேதுபதி தற்போது ‘மாமனிதன்’, ‘லாபம்’, ‘கடைசி விவசாயி’, ‘க /பெ ரணசிங்கம்’, ‘யாதும் ஊரே யாவரும் கேளிர்’, ‘துக்ளக் தர்பார்’ உள்ளிட்ட பல படங்களில் நடித்து வருகிறார்.

தற்போது கரோனா அச்சுறுத்தல் காரணமாக அமல்படுத்தப்பட்ட ஊரடங்கு உத்தரவால் எந்தவித படப்பிடிப்புகளும் நடைபெறாமல் உள்ளது. இதனால் விஜய் சேதுபதி தனது குடும்பத்தினருடன் நேரத்தை செலவழித்து வருகிறார்.

இதற்கிடையில் அறிமுக இயக்குநர் டெல்லி பிரசாத் தீன தயாளன் இயக்கத்தில், விஜய் சேதுபதி நடிப்பில் உருவாகி வரும் படம் ‘துக்ளக் தர்பார்’. இதில், விஜய்சேதுபதியுடன் பார்த்திபன், அதிதி ராவ், மஞ்சிமா மோகன், கருணாகரன் உள்ளிட்ட பலர் நடித்து வருகின்றனர்.

இப்படத்தின் படப்பிடிப்பு ஏறக்குறைய 50 விழுக்காடுகள் முடிவடைந்துவிட்டது. தற்போது இப்படத்தின் ஃபர்ஸ்ட் லுக் போஸ்டரை படக்குழுவினர் வெளியிட்டுள்ளனர். அரசியல் பின்னணி கொண்ட கதைக்களமாக அமைந்துள்ள இப்படத்தில் 'நானும் ரவுடிதான்' படத்திற்கு பிறகு விஜய் சேதுபதி - பார்த்திபன் கூட்டணி அமைத்துள்ளனர்.

7 ஸ்கிரீன் ஸ்டுடியோஸ் லலித் குமார் தயாரிக்கும் இப்படத்திற்கு மனோஜ் பரமஹம்சா ஒளிப்பதிவு செய்கிறார். கோவிந்த் வசந்தா இசையமைக்கிறார். விரைவில் இப்படத்தின் எஞ்சிய படப்பிடிப்புகள் தொடங்கவிருப்பதாக தகவல்கள் வெளியாகியுள்ளன.