ஆஸ்கார் விருதில் சிறந்த இயக்குநர், சிறந்த நடிகர், சிறந்த திரைக்கதை உள்ளிட்ட 11 பிரிவுகளில் பரிந்துரை செய்யப்பட்டிருக்கும் ஜோக்கர் திரைப்படம் பிப்ரவரி 14 ஆம் தேதி மீண்டும் திரைக்கு வர உள்ளது.
டிசி காமிக்ஸின் புகழ்பெற்ற கதாபாத்திரம் ஜோக்கர். இந்த கதாபாத்திரத்தை பல படங்களில் வில்லனாக காட்டியிருக்கிறார்கள். ஆனால் ஜோக்கரின் முன்கதையை யாரும் படமாக்கியதில்லை. இப்போது முதன்முறையாக ஜோக்கர் உருவான கதையை படமாக்கியிருக்கிறார் இயக்குநர் டோட் பிலிப்ஸ். ”ஆர்தர் ஃப்ளெக் என்பவர், எப்படி ஜோக்கராக மாறுகிறார்” என்பதை மையமாக வைத்து ‘ஜோக்கர்’ திரைப்படம் எடுக்கப்பட்டது.
அதில், ஜோக்கரின் கதாபாத்திரமான கோத்தமின் நொறுங்கிய சமூகத்தில் வாழும் ஆர்தர், தன்னைப் பற்றி அனைவரும் பேச வேண்டும் என விரும்புகிறார். மற்றவர்கள் கவனத்தைப் பெற ஜோக்கர் வேஷம் போட்டு அலைகிறார். ஆனால் பிறரால் அவமானப்படுத்தப்படுகிறார். உணர்ச்சியற்ற மனநிலைக்கும், கொடூர மனநிலைக்குமிடையில் சிக்கித் தவிக்கிறார். பின்னர் தொடர்ந்து தவறான முடிவுகளை எடுப்பதாக கதை நகரும். இந்த படம் வெளியான சில நாட்களிலேயே ரசிகர்களிடையே பெரும் வரவேற்பைப் பெற்றது.