கலைக்கு வயதே கிடையாது - 'தண்டகன்' இயக்குநர் மகேந்திரன்

குழந்தைகளுக்கு நேரிடும் சமூக அவலங்களை விளக்கும் உண்மை கதையின் அடிப்படையில் 'தண்டகன்' உருவாக்கப்பட்டுள்ளதாக இயக்குநர் மகேந்திரன் தெரிவித்துள்ளார்.

அறிமுக இயக்குநர் மகேந்திரன் இயக்கத்தில் நடிகர் அபிஷேக் நடிப்பில் உருவாகியுள்ள படம் 'தண்டகன்'. அபிஷேக் உடன் நடிகைகள் மனோ சித்ரா, அஞ்சு கிருஷ்ணா ஆகியோர் நடித்துள்ளனர். இப்படத்தை ராயல் ஃபிலிம் ஃபேக்டரி தயாரித்துள்ளது.

இப்படத்தின் இசை வெளியீட்டு விழா சென்னை பிரசாத் லேப்பில் நடைபெற்றது. இதில் கலந்துகொண்ட படத்தின் கதநாயகன் அபிஷேக் பேசுகையில், ’முதன் முறையாக ஹீரோவாக இப்படத்தின் மூலம் அறிமுகமாகி உள்ளேன். இப்படத்தில் போலீஸ் கதாபாத்திரத்தில் நடித்துள்ளேன். மற்ற படங்களில் நான் நடிக்கும்பொழுது எனக்கு ஆதரவு கொடுத்தீர்கள் அதே போன்று கதாநாயகனாக நடிக்கும்இந்த படத்திற்கும் நீங்கள் ஆதரவு கொடுக்க வேண்டும்’ என்றார்.

இவரைத் தொடர்ந்து படத்தின் இயக்குநர் மகேந்திரன் பேசுகையில், ”ராமாயணத்தில் இடம்பெறும் ஒரு கதாபாத்திரம்தான் ‘தண்டகன்’ இதையே படத்தின் தலைப்பாக வைத்துள்ளோம்.

சமூகத்தில் நடைபெறும் குழந்தை பாலியல் வன்கொடுமைகள் குறித்து விளக்கும் இந்த படம் ஒரு உண்மை சம்பவத்தை அடிப்படையாக கொண்டு உருவாக்கப்பட்டுள்ளது.

உடலுக்குதான் வயது, மனதுக்கு இல்லை. அதே போலதான் கலைக்கு வயது என்பது கிடையாது. எனக்கு சிறு வயது முதலே கலைத்துறையின் மீது ஈடுபாடு இருந்தது அதற்கான ஒரு வாய்ப்பு இப்போது வந்தது. தற்போது நான் இயக்குநராக உருவெடுத்துள்ளேன்” என்றார்.