சூரி, விமலுக்கு உதவி செய்த மூவர் பணியிடை நீக்கம்!

கொடைக்கானல்: பேரிஜம் ஏரிக்கு அனுமதியின்றி நடிகர்கள் சூரியும் விமலும் செல்வதற்கு உதவிய பணியாளர்கள், மூவர் பணியிடை நீக்கம் செய்யப்பட்டுள்ளனர்.

திண்டுக்கல் மாவட்டம், கொடைக்கானலில் உள்ள பேரிஜம் வனப்பகுதிக்கு முறையான அனுமதியின்றி நடிகர்கள் சூரி, விமல் உள்ளிட்டோர் சமீபத்தில் சென்றனர்.

அதுமட்டுமின்றி, அங்குள்ள ஏரியில் தடையை மீறி, அவர்கள் மீன் பிடித்ததாகக் கொடைக்கானலைச் சேர்ந்த மகேந்திரன் என்பவர் காவல் நிலையத்தில் புகார் கொடுத்தார். இதையடுத்து வனப்பகுதிக்குள் அனுமதியின்றி சென்ற நடிகர் விமல், சூரி உள்பட நான்கு பேருக்கு தலா இரண்டாயிரம் ரூபாய் அபராதம் விதிக்கப்பட்டுள்ளது.

இதனிடையே நடிகர்கள் தடையை மீறி, ஏரிக்குச் செல்ல உதவியவர்கள் மீதும் நடவடிக்கை எடுக்க வேண்டும் எனக் கூறப்பட்டது.

இந்நிலையில் தற்போது தடை செய்யப்பட்ட இடங்களுக்கு நடிகர்கள் செல்ல உதவிய தற்காலிகப் பணியாளர்கள் மூவரும் பணியிடை நீக்கம் செய்யப்பட்டுள்ளனர். மேலும் தொடர்ந்து இதுகுறித்து வனத்துறையினர் விசாரணை மேற்கொண்டு வருகின்றனர்.