கோவா இசைத் திருவிழாவில் தூள் கிளப்பும் 'டிரம்ஸ் சிவமணி'

கோவாவில் நடைபெறும் நிவான் ஹேண்ட்பான் மற்றும் உலக இசைத் திருவிழாவில் பிரபல இசைக்கலைஞர் சிவமணியின் சிறப்பு நிகழ்ச்சி அரங்கேறவுள்ளது.

கோவா தலைநகர் பானஜியில் நடைபெறவுள்ள நிவான் ஹேண்ட்பான் மற்றும் உலக இசைத் திருவிழாவில் பிரபல டிரம்ஸ் இசைக்கலைஞரும், இசையமைப்பாளருமான டிரம்ஸ் சிவமணி சிறப்பு விருந்தினராக கலந்துகொள்ளவுள்ளார்.

மியூசிக்கரி நிறுவனம் நடத்தும் இந்த இசைத் திருவிழா இன்று முதல் வரும் 9ஆம் தேதி வரை நடைபெறுகிறது. இந்த நிகழ்ச்சியை சிவமணி தொடங்கி வைத்து சிறப்பிக்கிறார்.

மேலும், இந்த இசைத் திருவிழாவில், இசைக்கலைஞர்கள் கபேகாவோ, மார்ட்டின் டுபோயிஸ், கிரெக் எல்லிஸ், ஆர்ச்சர் மற்றும் டிரிப், ஆண்ட்ரி தான்சு, நாதுலால் சோலங்கி, ராகினி சங்கர், த்ரிதா சின்ஹா ​​மற்றும் இந்திய ஹேண்ட்பான் இசைக்கலைஞர்களான ஜெய் கோசர் மற்றும் சாமுவேல் மூர்த்தி ஆகியோரின் சிறப்பு நிகழ்ச்சிகளும் அரங்கேறவுள்ளன.

நிவான் ஹேண்ட்பான் மற்றும் உலக இசைத் திருவிழா

இதுகுறித்து பேசிய சிவமணி, 'நிவானின் இந்த முயற்சியில் நான் ஒரு அங்கமாக இருப்பதில் மகிழ்ச்சி கொள்கிறேன். ஒரு டிரம்மர் மற்றும் ஒரு தாளவாத்தியராக இருப்பதால், இசை ஒருவரின் ஆன்மாவிலும் மனதிலும் எவ்வளவு இனிமையை, அமைதியை ஏற்படுத்தும் என்பதை நான் அனுபவித்திருக்கிறேன். இந்த மூன்று நாள் கொண்டாட்டத்தில் பார்வையாளர்கள் ஒரு புதிய அளவிலான மனநிறைவை அனுபவிப்பார்கள் என்பதை நான் உறுதியாக நம்புகிறேன்' எனத் தெரிவித்தார்.

நிவான் இந்திய இசை, ஆன்மீகம் மற்றும் கலாசாரத்துடன் கலந்த ஹேண்ட்பான் இசை அம்சமாகும். அனைத்து இசை ஆர்வலர்களுக்கும் பெருமை சேர்க்கும் வகையில் லாப நோக்கமின்றி இந்த நிகழ்ச்சி நடத்தப்படுகிறது.

இந்திய இசையில் ஹேண்ட்பானை நிலைநிறுத்துவதும், ஹேண்ட்பான் பிளேயர்களையும், இசை ஆர்வலர்களையும் ஒரு குடையின் கீழ் கொண்டுவருவதுமே தங்களது நோக்கம் என்று நிவான் ஹேண்ட்பான் நிகழ்ச்சி ஒருங்கிணைப்பாளர் தீபக் தக்கர் கூறினார்.

டிரம்ஸ் சிவமணி

எம்.எஸ்.விஸ்வநாதன், இளையராஜா, ஏ.ஆர்.ரஹ்மான் உள்ளிட்ட பல இசையமைப்பாளர்களின் படங்களில் டிரம்ஸ் சிவமணி பணியாற்றியுள்ளார். இவர் அரிமாநம்பி, கணிதன் உள்ளிட்ட படங்களுக்கு இசையமைத்துள்ளது குறிப்பிடத்தக்கது. திரைத்துறையில் சிறந்து விளங்கும் இவரைப் பாராட்டி தமிழ்நாடு அரசு கலைமாமணி விருதும், மத்திய அரசு பத்மஸ்ரீ விருதும் வழங்கி கவுரவித்துள்ளது.