ஸ்ருதிக்கு சமூகத்தின் மீது ஏற்பட்ட கவலை...!

மும்பை: 'உரிமைக்காக பெண்கள் நடத்தும் போராட்டங்கள் தொடர்கதையாக இருப்பது கவலை அளிக்கிறது. இந்தியாவில் மட்டுமல்ல உலகம் முழுவதும் இந்தப் பிரச்னை தற்போது நீடிப்பது விசித்திரமாக உள்ளது' என்று நடிகை ஸ்ருதிஹாசன் கவலை தெரிவித்துள்ளார்.

மும்பையில் நடைபெற்ற நிகழ்ச்சி ஒன்றில் பங்கேற்று பேசிய நடிகை ஸ்ருதிஹாசன்,

"பெண்கள் தங்களது உரிமைகளைப் பெறுவதற்காக தற்போதும் போராட்டங்கள், பேரணிகள் நடத்துகின்றனர். அவர்கள் தங்களது பாதுகாப்பு, சம உரிமைக்காக இவற்றை மேற்கொள்வது விசித்திரமாக உள்ளது. இந்தியா மட்டுமல்லாமல் உலகம் முழுவதும் பல ஆண்டுகளாக நடைபெற்றுவரும் இவற்றால், பெண்களுக்கான பிரச்னைகள் இன்னும் தீர்ந்தபாடில்லை.

பெண்களை மையப்படுத்திய கதைகளை வைத்து வெளிவரும் படங்களினால் மெள்ள மெள்ள மாற்றங்கள் நடக்கிறது. ஆனால் இவை முன்னதாகவே நடந்திருக்க வேண்டும்" என்று கூறினார்.

விஜய் சேதுபதி ஜோடியாக லாபம் என்ற படத்தில் நடித்துவரும் ஸ்ருதிஹாசன், இந்தியிலும் ஒரு படத்தில் நடித்துவருகிறார். மேலும், இவர் நடித்துள்ள டிரெட்ஸ்டோன் என்ற ஹாலிவுட் தொலைக்காட்சித் தொடர் விரைவில் ஒளிபரப்பாகவுள்ளது.