சமந்தாவுக்கு தலை வணங்கிய நடிகை ரகுல் ப்ரீத் சிங்!

சென்னை: 'தி ஃபேமிலி மேன் 2' இணையத் தொடரில் 'ராஜி' கதாபாத்திரத்தில், சமந்தாவின் நடிப்பு அட்டகாசமான வகையில் இருந்ததாக நடிகை ரகுல் ப்ரீத் சிங் தெரிவித்துள்ளார்.

நடிகர் மனோஜ் வாஜ்பாய், நடிகைகள் பிரியாமணி, சமந்தா உள்ளிட்டோர் முக்கியக் கதாபாத்திரத்தில் நடித்த தொடர் 'தி ஃபேமிலி மேன் 2'. அமேசான் ப்ரைமில் 2019ஆம் ஆண்டு ஒளிபரப்பான 'தி ஃபேமிலி மேன்' வெப் தொடரின் வெற்றியை அடுத்து அதன் இரண்டாம் பாகம் உருவாக்கப்பட்டுள்ளது. இந்தத் தொடரை இரட்டை இயக்குநர்கள் ராஜ் - டி.கே ஆகியோர் இயக்கியுள்ளனர்.

இந்தத் தொடரில் ராஜி என்னும் கதாபாத்திரத்தில் சமந்தா நடித்துள்ளார். இதன் மூலம் அவர் வெப் சீரிஸில் அறிமுகமாகிறார். 'தி ஃபேமிலி மேன் 2' தொடர் அமேசான் ப்ரைமில் ஜூன் 4ஆம் தேதி வெளியானது. தமிழீழ விடுதலைப் புலிகளை தீவிரவாதிகளாகச் சித்தரித்து ட்ரெய்லர் வெளியானதில் இருந்து தமிழ்நாட்டில் இந்தத் தொடரை தடை செய்யுமாறு பல்வேறு அரசியல் கட்சியினர் குரல் எழுப்பிய வண்ணம் உள்ளனர். இயக்குநர் சேரனும் இந்தத் தொடரை தான் புறக்கணிப்பதாகத் தனது சமூகவலைதளத்தில் கூறியுள்ளார்.

இருப்பினும் இந்தத் தொடர் ரசிகர்கள் மத்தியில் வரவேற்பை பெற்றுள்ளது. தற்போது இந்த தொடரை பார்த்த நடிகை ரகுல் ப்ரீத் சிங் இந்த தொடர்குறித்து தனது சமூகவலைதளப்பக்கத்தில் புகழாரம் சூட்டியுள்ளார்.

இது குறித்து அவர் தனது ட்விட்டர் பக்கத்தில், " 'ஃபேமிலி மேன் 2' தொடர் பார்த்துக்கொண்டிருந்தேன். அதில் நடித்த அனைவரும் அற்புதமான நடிப்பை வெளிப்படுத்தியுள்ளனர். இந்தத் தொடரில் மனோஜ் பாஜ்பாய் எத்தகைய நடிப்பை வழங்கியிருந்தார் என்பதை சொல்ல எனக்கு வார்த்தைகள் கிடைக்கவில்லை.

சமந்தாவுக்கு தலைவணங்குகிறேன். நீங்கள் ஒரு நெருப்பு பெண். ராஜி கதாபாத்திரத்தை நீங்கள் அட்டகாசமான வகையில் ஏற்று நடித்திருக்கிறீர்கள். என்னைப் போலவே என் குடும்பத்தினரும் உங்கள் ரசிகர்களாகி விட்டார்கள்" எனப் பதிவிட்டுள்ளார்.