மார்கழி மாதம் உறைய வைக்கும் பனியையே பொதுவாக நியாகப்படுத்தினாலும், கர்நாடக இசை உள்ளிட்ட பல இசை வடிவங்களையும் கொண்டாடும் இசைப் பிரியர்களுக்கு மார்கழி மாதம் மனதிற்கு இதமான இசையையே நினைவுக்கு கொண்டு வரும். இத்தகைய மார்கழி மாத இசை விழாக்களில் பெரும்பாலும் பழந்தமிழ்ப் பாடல்களே பாடப்பட்டு வரும் நிலையில், இந்த ஆண்டு இயக்குநர் ராஜீவ் மேனனும் பாடலாசிரியர் மதன் கார்க்கியும் இணைந்து புதிய தமிழிசைப் பாடல் ஒன்றை உருவாக்கியுள்ளனர்.
‘கடவுளும் நானும்’ எனும் தலைப்பில் இந்தப் பாடல் இந்த ஆண்டின் இறுதியில் வெளியாக உள்ளது. முன்னதாக இசைக் குடும்பத்தைச் சேர்ந்த ராஜீவ் மேனனின் இசையமைப்பில், அவர் இயக்கிய ’சர்வம் தாளமயம் படத்தில் ‘வரலாமா உன்னருகில்’ எனும் பாடல் இடம்பெற்று ரசிகர்கள் மத்தியில் வரவேற்பைப் பெற்றது. இப்பாடலை எழுதிய மதன் கார்க்கி திரைப்படப் பாடல்கள் தவிர நூற்றுக்கணக்கான தனியிசைப் பாடல்களையும் வெளியிட்டுள்ளார்.
இந்நிலையில், தற்போது இவர்கள் கூட்டணியில் உருவாகியுள்ள ‘கடவுளும் நானும்’ பாடல், கடவுளுக்கும் மனிதனுக்கும் இடையேயான நெருக்கத்தைப் பற்றிய வரிகளைக் கொண்டதாக அமைந்துள்ளது. இந்தப் பாடலுக்கு ராஜீவ் மேனன் காம்போஜி ராகத்தில் மெட்டமைத்துள்ளார். முன்னதாக, மைலாப்பூரில் நடந்த ஒரு இசை விழாவில் முதன்முதலாக இந்தப்பாடல் அரங்கேற்றப்பட்டது.