மீண்டும் 'ராஜகுமாரா' புனித் ராஜூடன் இணையும் ப்ரியா ஆனந்த்!

ப்ரியா ஆனந்த் கன்னட சூப்பர் ஸ்டார் புனித் ராஜ்குமாருடன் கன்னட படத்தில் நடிக்க ஒப்பந்தமாகியுள்ளார்.

நடிகர் ஜெய் நடிப்பில் வெளிவந்த 'வாமனன்' என்ற படத்தின் மூலம் தமிழ் சினிமாவில் அறிமுகம் ஆனவர் நடிகை ப்ரியா ஆனந்த். அதன் பின் 'வணக்கம் சென்னை', 'இங்கிலிஷ் விங்கிலிஷ்', 'எதிர்நீச்சல்', 'ஆதித்ய வர்மா', 'எல்கேஜி' உள்ளிட்ட பல படங்களில் நடித்து உள்ளார்.

இதனையடுத்து தற்போது ப்ரியா ஆனந்த், 'ஈட்டி', 'ஐங்கரன்' ஆகியப் படங்களை இயக்கிய ரவிராசு இயக்கும் கன்னட படத்தில் நடிக்கிறார். 'சிவாணா 123' எனப் பெயரிடப்பட்ட இப்படத்தில் கன்னட சூப்பர் ஸ்டார் புனித் ராஜ்குமார் நடிக்கிறார். இந்தப் படத்தை சத்ய ஜோதி ஃபிலிம்ஸ் தயாரிக்கிறது. சமீபத்தில் இப்படத்தின் படப்பிடிப்புக்கான பூஜை போடப்பட்டது.

ப்ரியா ஆனந்தும் புனித் ராஜ் குமாரும் ஏற்கெனவே 'ராஜகுமாரா' என்னும் படத்தில் நடித்துள்ளனர். இந்தப் படம் கன்னடத்தில் வெற்றி பெற்ற படமாகும். இவர்கள் மீண்டும் 'சிவாணா 123' படத்தில் இணைந்துள்ளனர். விரைவில் இப்படத்தின் படப்பிடிப்புகள் தொடங்கப்பட்டு படம் குறித்த அப்டேட் வெளியாகும் என எதிர்பார்க்கப்படுகிறது.