மோகன்லால் - ஜீத்து ஜோசப் கூட்டணியில் 2013ஆம் ஆண்டு வெளியாகி மாபெரும் வெற்றிபெற்ற திரைப்படம் 'த்ரிஷ்யம்'. திரில்லர் கதைக்களத்தில் வெளியான இந்தப்படம் மலையாளத்தில் பெரும் வரவேற்பைப் பெற்றதையடுத்து தமிழ், தெலுங்கு, இந்தி, கன்னடம் உள்ளிட்ட மொழிகளிலும் இப்படம் ரீமேக் செய்யப்பட்டது. இப்படம் மோகன்லாலின் திரையுலக வரலாற்றில் முக்கிய இடத்தைப் பெற்றுள்ளது.
அதுமட்டுமல்லாது இந்தத் திரைப்படம் சீன மொழியில் ரீமேக் செய்யப்பட்ட முதல் இந்திய திரைப்படம் என்ற பெருமையையும் பெற்றது. ஆறு ஆண்டுகளுக்குப் பிறகு மோகன்லாலை வைத்து 'ராம்' என்னும் புதிய படத்தை ஜீத்து ஜோசப் இயக்கி வருகிறார். இதில் மோகன்லாலுக்கு ஜோடியாக திரிஷா நடிக்கிறார்.
2019ஆம் ஆண்டு டிசம்பர் மாதம் இப்படப்பிடிப்பு தொடங்கப்பட்டது. கேரளாவில் எடுக்கப்பட வேண்டிய காட்சிகளை ஏறக்குறைய படக்குழு முடித்துவிட்டது. அடுத்தக்கட்ட படப்பிடிப்பை வெளிநாடுகளில் எடுப்பதாகத் திட்டமிடப்பட்டிருந்தது. தற்போது கரோனா தொற்று காரணமாகப் படப்பிடிப்பு தள்ளிவைக்கப்பட்டுள்ளது. இந்த சூழல் சரியான பிறகே 'ராம்' படத்தின் மீதி படப்பிடிப்பு தொடங்கப்படும் என்பதால் அதற்குள் 'த்ரிஷ்யம் 2' படத்தை இயக்கும் முயற்சியில் ஜீத்து ஜோசப் இறங்கியுள்ளார்.