சென்னை: இயக்குநர் மணிரத்னத்தின் மெட்ராஸ் டாக்கீஸ், லைகா புரொடக்ஷன் நிறுவனம் தயாரித்துவரும் வானம் கொட்டட்டும் படத்தின் ஃபர்ஸ்ட் லுக் வெளியிடப்பட்டுள்ளது.
இந்தப் படத்தில் விக்ரம் பிரபு, ஐஸ்வர்யா ராஜேஷ், மடோனா செபாஸ்டியன், சரத்குமார், ராதிகா சரத்குமார், நந்தா, சாந்தனு, அமித்ஷா பிரதான் உள்ளிட்டோர் பிரதான கதாபாத்திரங்களில் நடித்துவருகிறார்கள். இயக்குநர் மணிரத்னம் திரைக்கதை எழுத, புதுமுக இயக்குநர் தனா இயக்குகிறார். இவர் மணிரத்னத்தின் உதவியாளராக சில படங்களில் பணிபுரிந்துள்ளார்.
முன்னதாக படத்தின் டைட்டில் லுக் நேற்று வெளியிடப்பட்டது. இதையடுத்து வரும் ஜனவரி மாதம் படத்தை வெளியிட படக்குழுவினர் திட்டமிட்டுள்ளனர். இதற்கான பணிகள் விறுவிறுப்பாக நடைபெற்றுவருகிறது.
இந்தப் படத்தில் விக்ரம் பிரபு - ஐஸ்வர்யா ராஜேஷ் அண்ணன் தங்கையாகவும் அவர்களது பெற்றோராக சரத்குமார் - ராதிகா சரத்குமாரும் நடித்துள்ளனர். குடும்ப உறவுகளுக்கு முக்கியத்துவம் அளிக்கும் விதமாக ஃபேமிலி டிராமா படமாக வானம் கொட்டட்டும் திரைப்படம் உருவாகிவருகிறது.
இப்படத்தின் மூலம் பல்வேறு சூப்பர் ஹிட் பாடல்களைப் பாடிய பாடகர் சித் ஸ்ரீராம் இசையமைப்பாளராக அறிமுகமாகிறார்.
