மாநாடு தகராறு: கோவையில் 8 பேர் கைது

கோயம்புத்தூரில் மாநாடு படத்தை திரையரங்கில் திரையிட்டுக் கொண்டிருந்தபோது இரு தரப்பினரிடையே ஏற்பட்ட தகராறில் எட்டு பேர் கைதுசெய்யப்பட்டனர்.

கோயம்புத்தூர்:திரையரங்கு ஒன்றில் மாநாடு திரைப்படத்தின்போது இரு தரப்பினரிடையே தகராறு ஏற்பட்டுள்ளது. இது குறித்து வழக்குப்பதிவு செய்து விசாரணை மேற்கொண்ட பந்தயசாலை காவல் துறையினர், ஒரு தரப்பில் 10 பேர் மீது வழக்குப்பதிவு செய்து மகேஸ்வரன், கெளதம், கதிரன் ஆகிய மூவரை கைதுசெய்துள்ளனர். மீதமுள்ள எழுவரைத் தேடிவருகின்றனர்.

மற்றொரு தரப்பில் முகமது அசாருதீன், அப்துல் ரகுமான், முகமது அஸ்பர், முகமது சல்மான், ஷாநவாஸ் ஆகிய ஐவர்மீது வழக்குப்பதிந்து கைதுசெய்தனர்.

கைதுசெய்யப்பட்டவர்கள் மீது கலகம் செய்தல், காயம் ஏற்படுத்துதல், கொலை மிரட்டல் விடுதல், ஆபாசமாகப் பேசுதல் ஆகிய பிரிவுகளின்கீழ் வழக்குப்பதிவு செய்யப்பட்டுள்ளது. பின்னர், இந்த எட்டு பேரையும் காவலர்கள் நீதிமன்றத்தில் முன்னிறுத்தி சிறையில் அடைத்தனர்.